Gundam Expo 2011熊出沒注意

雖然唔係人人都可以飛去靜岡嘅Bandai總部朝聖，不過香港嘅高達迷其實都幾幸福，因為每逢年尾都有Gundam Expo，既會展出經典嘅高達模型，又有新品預覽，加埋特別版模型即場開售，搞到粉絲唔去唔安樂。今年就以「高達模型世界巡迴展覽—香港站」再度舉行，大堆頭之餘，仲有連龔嘉欣都冧嘅熊霸特別版率先喺場內發售，今次Gundam Expo仲唔係男女通殺？

高達模型世界巡迴展覽喺今年七月已經展開，於上海、台灣、韓國、北京、廣州、新加坡及日本等地巡迴展出後，壓軸一站輪到香港，即日至本月27日於愉景新城舉行。場內分為四大部分，「高達模型歷程」就展出由1980至2011年間嘅高達模型，令粉絲好似走入時光隧道，重溫高達模型嘅發展歷程，當中多款絕版作品，相信最易激起粉絲「那些年」嘅回憶。

報喪女妖全球首展

溫故之餘，「高達模型家族」更加幫你知新，場內重點展出了Gundam AGE、Gundam SEDD及BB戰士模型，仲有尚未推出嘅MG Full Armor Unicorn Gundam、MG Gundam Heavyarms、SD版Gundam AGE及Legend BB系列都喺場內現身，尤其是《Gundam UC》第四集出場嘅「報喪女妖」（RX-0-2 Unicorn Banshee），佢嘅HG版模型更喺場內進行全球首展，讓粉絲先睹為快。

睇完成品睇到心癢癢嘅話，場內另有「高達初體驗」專區，畀你即場砌高達模型；想砌得Pro啲，就要觀摩高手作品喇，本月25日場內仲會舉辦「高達模型製作家環球盃2011世界錦標賽」，展出於日本、韓國、台灣、新加坡、馬來西亞、菲律賓、印尼、澳洲、北美洲、意大利、香港及內地通過預選嘅精英之作，並會即場進行評審，選出各組別嘅第一、二、三名，模型迷屆時要落足眼力了！

(目及)實特別版模型

除咗觀摩，當然唔少得入場掃貨，今次展覽就預備咗唔少特別版模型壓場，包括依家已經賣緊嘅四款透明特別版，分別係HGUC 1/144 Z高達、MG 1/100量子00高達、MG 1/100馬沙專用渣古ⅡVer.2.0、BB高達三國傳真龍裝劉備高達連白銀流星馬，本周四仲會加推HG 1/144 Gundam AGE-1 Normal電鍍特別版，以及HG 1/144熊霸粉紅色特別版，喺早前嘅開幕禮上，嘉賓龔嘉欣就對Cute爆嘅熊霸愛不釋手，想導女友或老婆都做埋高達迷，你知點做啦！

活動小資料

名稱：高達模型世界巡迴展覽—香港站

日期：即日至本月27日

地點：荃灣青山道愉景新城購物商場第一層天幕大堂

時間：10:00am-8:00pm

入場費：全免

網址：http://hk.gundam.info/