on.cc 東方互動主頁

忠實還原1989 Batman Chok Look

有黑暗就有光明、有邪惡就有正義，因此當Hot Toys傾盡全力打造Jack Nicholson版小丑時，順理成章Michael Keaton版嘅Batman都會緊接登場冇失拖啩！HT果然冇令大家跌眼鏡，貫徹品牌一向嘅高像真度之餘，仲可以轉眼、換嘴，加埋炭黑包膠Body及大量配件，將1989年嘅各式Batman Chok樣忠實還原。

今時今日嘅Batman型得咁緊要，實在多得Tim Burton唔少！事關喺佢嗰套1989年上畫嘅《Batman》之前，但凡真人拍攝嘅蝙蝠俠，都係一個着住灰色衞生衣、肚腩凸過胸肌嘅騎呢大叔，打交時仲會出現「Boooom!」呢類漫畫形聲詞，低能有餘，型格不足。Tim Burton就由故事到角色造型，都大大開拓咗Batman嘅深度，令佢跳出漫畫嘅「兒童向」，變得有血有肉有感情，正式成為一代經典。身為Batman瘋狂粉絲嘅老闆Howard，喺公司成立之初就有將年版本嘅Batman Figure化嘅構思，如今財力、人力終於到位，多年願望得以成真，據知他日Batmobile及Batwing亦會緊接推出，實行完美補完。

三款任換啱嘴形

喺Jack Nicholson小丑之中，Yulli向大家示範何謂完美雕工，今次Michael Keaton Batman改由擅雕陽剛味角色嘅Kojun及GOX出手，神似度不相伯仲，頭笠上嘅肌肉紋理、寬度、雙耳嘅擺位及比例，統統都計算準確，而唯一外露嘅下巴部分，就有冷靜、憤怒及爆缸三款嘴形任換，方便玩家變臉。貴為系列，有埋可轉眼球嘅PERS系統並唔出奇，但跟小丑一樣，Batman嘅眼珠顏色同大細都經過改良，無論望向邊一面都Show出憂鬱眼神。不過Figure本身仲有兩大不足之處，一係頭笠幾乎與膊頭相連，所以相當「硬頸」，頸位嘅可動性極低；二係電影中蝙蝠俠從未以真面目示人，所以隨盒亦冇Michael Keaton嘅真人全面相頭雕，玩少一款造型，可惜！

金屬Feel炭黑包膠

年版Batman唔再着衞生衣，改為型到震嘅黑色貼身盔甲，就用包膠Body表達，並且搵嚟本地雕刻師Pan負責肌肉紋理，配合JC.Hong擅長嘅炭黑塗裝技巧，令包膠Body都呈現出一種金屬質感。另外，為咗提升靈活性，Body手肘、膝蓋等關節位嘅內部都特別偷空，保證郁手郁腳時唔會「硬晒軚」，而且斗篷內藏鐵線定型，擺甫士更加隨心所欲。配件方面，電影中出現過嘅總算落齊，包括繩索發射器、蝙蝠形倒鈎、三支煙霧彈、兩把忍者鏢、計時器、蝙蝠車遙控器及可組合嘅短槍等，數量都算多，但比起同價又超多配件嘅小丑嚟講，Batman嘅性價比似乎唔夠高喎。