駁電視‧變Netbook　ATRIX 4G手機萬能插

若大家有留意開科技新聞，一定會對Motorola年初發表嘅ATRIX 4G留下深刻印象。呢部「手機萬能插」日前喺香港舉行咗場傳媒試玩會，見住工作人員用佢拮完Notebook上網，又再拮電視播高清、兼玩《Angry Birds》，玩法顛覆手機傳統，就連小記玩機無數，都畀佢搞到腎上腺素上升！

講明係試玩會，即係話香港仲未有得賣，若然等唔切，其實到先達走一轉就可用六千元左右買到部水貨機，想再平啲，淘寶網水貨都係賣緊$4,450人仔，唔算貴！然而，呢部機最大賣點係有Docking可以選配，惟後者全球缺貨，與其玩唔到呢個咁重要嘅賣點，不如等埋行貨先一次過買都未遲！

快Nexus One一倍

Motorola話ATRIX 4G係「世上最強智能手機」，講到咁勁，實際表現又如何呢？小記睇完規格表，就知佢冇吹水。處理器係雙核心Tegra 2，速度達1GHz，並內置1GB RAM及16GB記憶體，根本同部電腦冇分別；若開埋Benchmark測試，得分更快Nexus One成倍有多，誇張！4吋芒亦靚爆鏡，表面係堅硬Corning Gorilla Glass，內裏則是960×540解像度嘅qHD背板，比例剛剛好係16:9，睇片時可以飛走上下兩條黑邊，爽！連電腦常見嘅指紋識別佢都玩埋，開機後要印一印手指頭方能登入，私隱度極高！

駁電視玩憤怒鳥

依家人人話Smartphone愈來愈似電腦，不過普遍用家仍習慣將兩者分開使用，ATRIX 4G最爆之處就係將它們合二為一。方法之一係將手機插入高清多媒體底座，透過HDMI把畫面輸出至大電視，咁樣除咗可以播放內置嘅720p高清影片外，仲可以用埋Remote遙控聽歌、睇相；更可透過底座內嘅Webtop介面，一邊喺電視屏幕撥號打電話，一邊透過Firefox上網兼玩Facebook，若嫌唔夠激，仲可以用埋部大電視玩《Angry Birds》等Android遊戲，打雀度位就更清晰仔細。

變長氣Netbook

另一個方法就更加徹底，事關呢款名為Lapdock嘅Docking，根本就係一部電腦，僅重2.4磅，並有齊11.6吋屏幕、全鍵盤、TouchPad、USB連接埠及立體聲喇叭，其36Wh三芯電池更能提供8小時續航力，規格等同一部Netbook。不過佢就冇電源開關，一定要插入手機先着到。呢個時候之前提到嘅Webtop介面就會自動打開，同樣可經它撥號、上網兼打機。惟留意當有來電時，用戶要拎起手機或透過藍芽Handsfree才能接聽，事關Lapdock係冇Mic-In介面畀你傾電話，亦冇前置鏡頭玩視像通話，設計爭咗少少。