電影Apps即時訂票睇預告

今屆香港電影節剛剛開鑼，想睇好戲但仲未買飛？唔使怕，今年《香港國際電影節》大會都跟其他國際影展睇齊，推出官方iPhone App，有齊電影介紹兼可即時上網買飛，勁方便！不過除咗呢個電影節App外，查實App Store上都有好多跟電影相關嘅Apps，啱晒各位影迷慢慢玩，而且大部分仲係免費添！

現時App Store上嘅電影Apps，種類真係多不勝數，由影評、預告片、遊戲，甚至連方便你寫低觀後感嘅筆記簿都有，依家小記就精選出幾款好玩又實用嘅程式，等大家掌握最新嘅電影資訊。

《香港國際電影節》唔怕失場 費用：免費

好多國際性影展都已出咗iPhone App，今年《香港國際電影節》都不甘後人，首度推出官方App，唔使攞住場刊都可以隨時睇到各齣電影嘅資料。呢款App仲有埋互動功能，可以即時睇到邊啲場次已經滿座或有更新外，亦能夠即時連線買飛，甚至可以Upload相片到官方網站添！筆者覺得最好用嘅係日曆功能，揀完戲後可以直接儲存到日曆內，仲可Sync到iPhone上嘅行事曆，咁就唔怕唔記得入場啦！

《IMDb》專業影評 費用：免費

好多戲迷都識得上imdb.com呢個大型電影資料庫，搵番某套戲或某位演員嘅資料，而呢個《IMDb》亦係官方App，網站上有嘅功能，佢都做到，仲可睇埋世界各地影迷對呢齣戲嘅評價，基本上評分有7.3以上就難睇極有限，好似《Fa Yueng Nin Wa》（即係《花樣年華》）嘅IMDb評分就有8.1，都幾中肯！

《Filmtrailer》歐片預告 費用：免費

如果跟筆者一樣唔太鍾情於荷里活電影，呢個《Filmtrailer》就更啱大家。《Filmtrailer》收錄咗包括英國、法國、意大利、西班牙、德國等十個歐洲國家上映中嘅電影資料及預告片，平時真係冇乜機會接觸得到。除咗電影預告片外，仲加入咗唔少製作人訪問同首映禮片段，連汁都可以撈埋。

《香港電影》本地最強 費用：免費

行行吓街突然想睇戲嘅話，呢款《香港電影》App就大派用場。事關佢一㩒就有齊全港正在上映嘅電影資料，由開場時間、上映戲院、戲院座位編排以及戲票價錢都一目了然，仲可以經由程式購買MCL院線同The Grand戲院嘅戲票，咁幾時都可以睇好戲啦！

《Movie Challenge》常識挑戰 費用：US$1.99

自問係超級影迷的話，不妨單撈《Movie Challenge》App嚟挑戰一下自己嘅電影知識！《Movie Challenge》以趣味為主，設有10個唔同分類，合共提供5,500多條原創問題，要全部答中真係難過登天。程式還設有7款迷你遊戲畀大家玩，如Fill in the blanks，或以電影海報拼圖叫大家估戲名，玩落都幾有Fun。

《Movie Memo》電影手記 費用：免費

唔知大家睇完電影後會唔會記低觀後感？《Movie Memo》就係專門為此而設嘅電影筆記簿，可以逐個項目填入套戲嘅資料，由戲名、導演、演員同觀後感等，而且仲可以連線搵埋電影嘅海報同封面，整理出個人電影手記。

《Mobile Film Festival》手機短片 費用：免費

手機拍片難登大雅之堂？當然唔係啦，韓國大導朴贊郁用iPhone拍嘅《Night Fishing》，今年仲得到柏林影展大獎。呢個為法國Mobile Film Festival 2011而設嘅《Mobile Film Festival》App就收錄咗50套用手機拍成嘅參賽短片免費畀大家睇，水準真係高到你唔信！