iPhone虛擬浪漫猜謎放天燈

今日係元宵佳節，亦即中國情人節，古人會喺呢個時候參加花燈會、放天燈或者猜吓燈謎。現代人當然冇咁嘅閒情逸致，好彩有iPhone幫手，單撈幾個Apps就可以安坐家中放天燈，仲有燈謎畀你慢慢估，一於同情人揸住iPhone重溫前人的浪漫！

古代女子三步不出閨門，淨係去到元宵佳節先可以夜遊花燈會，咁先有機會見到心儀嘅男仔，所以元宵節又名中國情人節。今時今日，男女約會當然唔使偷偷摸摸，仲可以喺呢個咁歷史悠久嘅節日同愛人食吓湯圓，溫馨過元宵。

《廣東甜品（糖水）》糖水潤喉夠Sweet

傳統元宵節都會一家人食吓湯圓，取其「團圓」、「圓滿」之意。不過唔係人人鍾意食湯圓，不如整吓其他中式糖水仲好。《廣東甜品（糖水）》內置多種廣東糖水嘅煮法，包括大家成日食到嘅番薯糖水、雪耳冰糖燉雪梨、桑寄生雞蛋茶，仲提供埋糖水嘅功效，啱晒唔熟烹飪嘅朋友，食完糖水就夠晒甜絲絲！

費用：US$2.99

雖然元宵佳節最啱食糖水，不過落手煮都有番咁上下難度。如果想過吓甜品癮，不如玩吓《幸福甜品屋》。新App玩法好簡單，會根據顧客的要求，將甜品材料照單執藥，揀啱晒材料就可以做出「金牌甜品」。另外，遊戲內容夠晒豐富，有超過60種甜品以及70種材料，而且仲有獎盃畀你慢慢儲，非常耐玩。

費用：US$2.99

傳統花燈會其中一個重頭戲必數猜燈謎，男女老少圍住謎面齊齊估，極考智力。《猜燈謎》App就提供20款燈謎畀你估，雖然數量唔算好多，不過勝在有特色兼有難度。如果自問文化水平更高，更可以自創燈謎，利用投稿功能將燈謎上載，等大家都可以挑戰吓！

費用：免費

相傳在天燈寫上願望，然後點火放上天就有祈福作用。不過，喺香港搵處可以放天燈嘅地方都唔容易，用《祈福天燈》仲方便！新App以放天燈為主題，仲可以畀大家揀放天燈嘅地點，包括都市、深山同海邊。遊戲畫面就唔算好靚，不過喺元宵佳節放天燈就夠晒意頭，希望大家新一年事事順利！

費用：免費

元宵佳節一到，Send SMS都Send到手軟。唔想次次都「咩咩快樂」咁行貨嘅話，不妨單撈呢隻《Text Wishes Free》。預設多個不同節日嘅祝福語，當然有今晚嘅元宵節。仲有幽默祝福或者普通祝福兩款內容畀你選擇，幾十條抵死SMS任揀，內容抵死又盞鬼，情人或朋友收就一定笑騎騎！

費用：免費

元宵佳節傳統都會放天燈，但時間一過就會逐個掉下來。為免壓傷途人，有個乖小孩就手拿一個彈弓，希望把天燈射返去安全地方。遊戲方法很簡單，玩家只要看到天燈上有甚麼圖案，然後跟着在屏幕照畫，就能把天燈射落。惟留意圖案一定要寫在天燈下的空白位置，否則就不計數;而有時幸運的話，還能一次射下兩個天燈呢！

費用︰US$0.99

Vincent

Baby，我又猜中燈謎。
你好叻呀！（設計對白）