筲箕灣細場 開心DIY

唔知大家有冇諗過，逛商場Shopping嘅同時亦可以參加興趣班學吓嘢呢？筲箕灣天悅廣場，除咗有好多別致又夠便宜嘅精品任選購之外，當中有唔少店舖嘅老闆會開班教授手工藝品製作，甚至免費教大家表演魔術嘅技巧及分享茶藝心得，邊個話行街Shopping冇建設性o架？

自製蜜糖肥皂

位於1/F嘅「樂天一派」，店內除咗售賣精品之外，仲有唔少手工藝品選購，例如肥皂、果凍蠟杯、彩沙同皮革用品等，送畀另一半認真物輕情義重。如果仲嫌未夠Sweet，想親手炮製件愛心肥皂或飾物畀Honey嘅話，可以報讀店中嘅DIY製作班。老闆娘表示：「情侶最講求心意，故此唔少男女都鍾意拍住拖嚟上堂，而近期最受情侶歡迎嘅就係『DIY肥皂製作班』，親手製作肥皂嚟洗白白，感覺倍感溫馨之餘，最近天氣十分乾燥，如果加入蜜糖同甘油嘅話，仲有滋潤皮膚嘅作用添！」隨咗DIY肥皂外，仲有DIY果凍蠟杯製作班，Shopping之餘仲可以學做手工藝，你嘅另一半見到你咁體貼，即時甜到入心啦！

DIY肥皂製作班

內容：教授製作3件不同造型的肥皂

學費：$250/堂（包材料費，課堂約

　　　1小時45分鐘）

DIY果凍蠟杯製作班

內容：教授製作4件不同的果凍擺設

學費：$250/堂（包材料費，課堂約

　　　個半小時）

變身魔術師

魔術用品店好多地方都有，但位於G/F嘅「Magic Star」就有啲唔同，事關店內除咗售賣魔術用品之外，老闆仲會免費教授玩魔術嘅技巧添！原來老闆係一位業餘魔術師，經常被邀請出騷表演。老闆表示：「累積咗咁多表演經驗，我想為推廣魔術出一分力，故此我會教授客人玩魔術嘅技巧，例如要點樣表演至有出色效果，同埋點樣先至唔穿崩，仲要配合一定嘅演技和表情，咁先至可以讓觀眾睇得投入。」老闆仲話由佢指導，大家好快就可以變身成為魔術師。

買茶葉學沖泡

對於想買茶葉同茶具嚟氹世伯伯母嘅情侶嚟講，面對各種茶葉同茶具，真係唔知點樣入手！位於G/F嘅「溪峰茶莊」，不但有齊各種茶葉，從新茶葉到陳年老茶葉都有，仲有各種茶具任君選擇。而老闆娘更係茶藝高手，相當樂意跟客人分享茶藝心得。每當有客人請教茶藝時，佢都會細心教導，幫客人揀選啱心水嘅茶葉同茶具。老闆娘表示：「其實唔同嘅茶葉要用唔同嘅茶具嚟配合，加上唔同嘅手法沖泡，先至可以帶出茶葉嘅真正味道。」老闆娘又話，好多人都鍾意用紫砂茶壺飲茶，如果想令茶味更濃嘅話，最好就係用個火爐嚟熱茶，就能起到保溫同提升茶味嘅效果。

查詢：（a）2886 9721　（b）2513 8777　 （c）9754 3929