角木肇出手Temjin破芒
唔少70及80後嘅男生，都一度「沉淪」於電玩名作《Virtual On》，近年「壽屋」都出過呢個系列嘅模型，最Hit當然係主角機Temjin「鐵木真」啦！不過機身嘅複雜分色，對模型初心者嚟講有一定難度，今年Bandai決定將呢個「仔」交番畀佢嘅「親生老竇」角木肇（Katoki Hajime），重新執靚之後，以「COMPOSITE Ver.Ka」嘅全上色完成品姿態，衝出大屏幕。
背脊出碟夠驚喜
顧名思義，整個「COMPOSITE Ver.Ka」系列都由角木肇主理，佢最拿手將真實化嘅機械細節，例如螺絲位、喉管及線紋，融入科幻動漫嘅機械人角色，呢款Temjin就繼承晒Ka版神髓，全高約140mm，主體沿用電玩設定嘅藍、白、灰三色，機體上清晰嘅幾何圖案，仲有手臂及雙腳嘅深色坑紋，完全Show番晒VR嘅Cyber感覺。
雖然唔係超合金，膠感相當重，但勝在關節實淨，小記同佢任扭任擺甫士都冇鬆過，而且膝蓋用咗三重關節，加埋腳掌嘅雙重關節，能夠做到疾馳、跳躍等電玩中嘅出招姿勢。最驚喜係背部嘅V形變流器，打開Saturn蓋，重演遊戲中衝刺時升起光碟嘅機關，VR粉絲見到一定感動！
新Game 12月殺到
《Virtual On》係Sega著名嘅3D機械人對戰Game，第一代於1995年喺街機登場，96年移植到家用機Saturn、07年再移植到PS2，機設正係由角木肇一手包辦。最新版本《Virtual On Force》將於今年12月22日喺Xbox360推出，支援4人對戰，可用機體超過90部！
查詢︰2433 1828（瑞華行）
Temjin招牌嘅衝刺突擊甫士，多得高可動性嘅雙腿，十足打機Feel。
光線巨劍比較墜手，舉高真係甚有難度，都係「拖地」好啲。
COMPOSITE Ver.Ka Virtuaroid MBV-04 Temjin 建議零售價約$410
成部Saturn咁款嘅V形變流器，唔只可以完全打開，內藏嘅光碟仲會升起，重現噴射狀態。
膝蓋用咗三重關節，加埋腳掌嘅雙重關節，活動能力真係高幾班。
手肘只可以屈成，好彩肩甲有醒目嘅「MBV-04」標記，加番唔少印象分。
「土製菠蘿」一個！記唔記得打機時要靠佢製造爆風，方便斬擊敵人呢？
《Virtual On Force》將於12月登錄Xbox360，VR粉絲又要晚晚煲機了！