當網上剛流傳出F300EXR嘅規格時，幾乎整個相機界都在留意它正式推出嘅日子。點解Fujifilm FinePix F300EXR咁受注目呢？原因好簡單，事關細細部DC仔已經擁有15X光學變焦兼又具備單反對焦速度，簡直係玩家夢寐以求嘅裝備。

此機使用嶄新的EXR Super CCD，繼承前代優良嘅相片質素，搭配由富士研發嘅15倍變焦鏡頭，質素有保證，而且機身手感一流，按鍵轉盤等都經過重新設計，務求令設定更快速。

$2,980

F300EXR的全景拍攝備有120°、240°和360°選擇，可避免拍攝全景相時影到身後的朋友。

對焦速度 媲美單反

F300EXR最大賣點就係對焦速度媲美單反，全因此機採用了「內置相位偵測像素CCD」，聽落好Pro，其實設計原理好簡單。一般而言，DC嘅對焦速度都較單反慢，因為大部分DC都是使用對比度自動對焦系統，好多時都唔夠使用相位偵測嘅自動對焦系統咁快，不過適合於昏暗嘅拍攝環境。於是富士就將兩種對焦方法結合到同一塊感光元件上，當用家進行自動對焦時，相機會因應情況自動使用其中一種對焦方式，最快0.158秒就已經成功對焦，仲快過人類正常嘅0.2秒反應時間。

此機仍舊保留貓狗寵物識別模式，方便影低牠們的生活照。	模式轉盤設於機頂右上角，可用拇指轉動去切換。	機背方向轉盤上方分別設有獨立的拍片及播放按鈕，轉換更快捷。

減磅瘦身 手感一流

雖然F300EXR只有黑色一款，不過廠方都花過心思去設計機身。為減少機身體積，鏡頭使用雙滑動式鏡片機制，熄機時會自動將兩組鏡片抽離鏡頭中心部分，令機身變得更薄。另外，機背所有按鈕都設於右邊，模式轉盤亦傾斜地放在機頂右上角，基本上單用右手就能操作，非常方便，而於兩個轉盤中間則加入「一按即錄」按鈕，避免用家誤觸。可惜機頂閃燈於開機時便會自動彈出，直至關機才會收起，實在有點礙眼，若能加以改善，相信整體設計會更加完美。

全景拍攝 於沒有腳架的情況下作240°全景拍攝，相片整體上曝光準確，但仔細看仍會發現其接駁位置，建議用家以介面所示的水平位置進行拍攝，效果會較佳。	室內人像 於室內環境下關閉閃燈影模特兒，相片雜訊仍可接受，而且模特兒膚色紅潤，沒有黑面問題。	寵物模式 利用寵物識別模式，相機很快就偵測到小貓面部，即使小貓正面移離鏡頭，F300EXR都能正確對焦，值得一讚。

360°全景 靈活方便

以相機配備24mm廣角及15倍光學變焦嘅特性，相信是為旅行DC市場而設。今次F300EXR更加入多種拍攝模式，將機能發揮到極致，例如鍾意人像攝影嘅話，可以使用Pro Focus淺景深模式，利用數碼影像技術將背景模糊化；另一個主打模式為360°全景模式，無論你想打橫影全景相，定係打直影都得，仲有120°、240°和360°選擇，可隨意由上下左右四個方向開始拍攝，靈活性一流，影風景時就大派用場。當然唔少得人臉、BB，甚至貓狗面孔嘅偵測技術，啱晒一家大細使用。

機檔案

感光元件：1/2吋 Super CCD EXR

解　像　度：1,200萬像素

焦　　距：24-360mm（15倍光學變焦）

最大光圈：f/3.3-5.6

顯　示　屏：3吋46萬像素TFT LCD

拍　　片：1,280×720@24p

體　　積：103.5×59.2×32.6mm

重　　量：195g

查詢：2406 3225