日圓雖然持續高企，但日本對香港旅客嚟講仍然好有吸引力，買張機票或Package自由行都好方便，嚟緊香港有航空公司更做到$1,900直航東京（今年十一月），真係心郁郁！除咗帶錢以及帶個「吉」篋去掃貨外，為部iPhone裝定幾個有用嘅Apps，去日本自由行就暢通無阻啦！

吃喝玩樂篇

《TV紹介の店舖檢索》

下載費用：免費

何為人氣店舖，從日本電視台訪問過嘅次數就可知一二，從《TV紹介の店舖檢索》就可知道每間人氣店舖受推介次數及內容；App內仲分為食、玩、住、買四項，啱晒香港人嘅要求。

《食Log》下載費用：免費

《食Log》似足本地嘅Openrice，當中詳列每間餐廳資料同評分，口味夠晒地道，唔似香港旅遊書咁表面；App內仲有GPS功能定位幫你搵路，唔怕搵唔到。

《Starbucks Search》

下載費用：0.99美元

Starbucks在日本開到成行成市，突然間想飲杯Latte嘅話，都可以用呢個App Search下邊度有Starbucks，仲有埋交通指南同營業時間畀你睇添。

《2010年花火大會Navi》下載費用：0.99美元

暑假去日本，當然唔可以錯過花火大會，想知道每個地方花火大會的日期同地點，裝呢個App就可睇晒所有資料，仲有日文同英文兩種介面。

交通篇

《Traffic情報》

下載費用：免費

有時在日本搭JR都間唔中見到屏幕打出「人身事故」，封路下會影響行程。如果想知道無論係機場、道路或鐵路有無因交通事故而擠塞，都可以從這個App入面睇到晒。

《日本之駅M》下載費用：0.99美元

日本鐵路非常發達，但一個車站可能有成十幾條線，好易搭錯車。《日本之駅M》就詳列日本鐵路線同駅（即係車站）嘅名稱，仲有地圖輔助，使用方便。

《駅之友Platinum》下載費用：1.99美元

《駅之友Platinum》除咗收錄列車路線同車站檢索等內容之外，仲可以配合GPS定位功能搵出最近的車站，就算行行吓認唔到路都唔使閉翳。

語言篇

《居酒屋之日本語》

下載費用：$0.99美元

夜晚去居酒屋食飯，除咗手指指之外，仲可以用呢個App扮講日文。好似通常去居酒屋食飯，都會叫杯生啤飲吓，照住講「Nama Chuu Kudasai」（畀杯生啤）就搞掂！

《不失禮遊日對話器》

下載費用：3.99美元

App內收錄晒大部分旅行時所需要用上嘅日語，仲可切換繁簡體中文及英文說明；雖然下載費用唔算平，但勝在一App在手，就唔怕溝通唔到。

Photo Apps玩特效

iPhone 4已經可以「變焦」兼在同一畫面上一篤即可對焦，但想在異國影到更特別嘅旅行相，就可以諗吓呢幾個Photo Apps。

《Tiltshift Generator》

下載費用：0.99美元

唔使用移軸鏡或後期用Photoshop執相，用《Tiltshift Generator》就可以輕易做到「玩具Feel」嘅效果！

《CAMERAtan》

下載費用：0.99美元

Toy Digital Camera點平都要三、四百元，只賣0.99美元嘅《CAMERAtan》就設有多達三十二種Effect，扮埋Toy Camera都得，好抵玩！

《Pudding Camera》

下載費用：免費

睇唔明韓文開機畫面唔緊要，操作介面就會用上圖像化設計，可揀魚眼鏡、四格Lomo、Panorama等Toy Camera效果，好玩。