管家仔林峰唔拍鍾嘉欣，改拍謝婷婷真係少見，兩人仲要在台上摸黑現身，原來係為了介紹Nikon新一代夜攝機王D3S，在漆黑環境下可將感光度擴展至102,400，即時利用高ISO連環快拍和錄製高質素影片，帶來前所未有的拍攝體驗。

繼早前將D300升級至D300S後，Nikon旗艦機款D3亦正式過渡至D3S，很多人以為淨係強化D-Movie玩高清拍片，其實更重要是提升感光系統，令新機在昏暗環境都能捕捉一瞬即逝嘅精彩時刻，無論拍流星雨、夜間運動，甚至做狗仔隊追星都啱用。

謝婷婷表示平時同男友影相都鍾意玩Effect，依家呢部D3S新機就更啱用。

D3S發布會尾聲，神秘嘉賓Miss Chan Chan（右）光臨，仲同Nikon香港董事長御給伸好先生合唱。

超高ISO 漆黑環境照影

平時影相ISO去到3,200已起晒渣，所以礙於成像質素，用家甚少使用到更高的ISO設定，因此D3S換上36×23.9mm大尺寸CMOS感光元件，受光面積更大，配合EXPEED 16-bit處理系統，大大減少高ISO產生的雜訊，就算將ISO推到12,800仍覺細緻逼真。另外在伸手不見五指的演唱會、宴會派對等場合，還可選用擴展模式，將ISO調高三級至102,400捕捉每個畫面。

Nikon D3S（淨機）$38,800 Nikkor AF-S 70-200mm F2.8G ED VR Ⅱ$18,980	D3S與D3同屬千二萬像素，但新機改用大尺寸CMOS，受光面積增加，畫質自然有所提升。	ISO基本由200至12,800不等，擴展模式可推至Hi3，即係再高三級至ISO 102,400。

全新CMOS 每秒九張連拍

高ISO另一好處是可靈活提升快門速度，例如想在東亞運動會捕捉劉翔衝線一刻，開閃燈又怕影響參賽選手，帶腳架又嫌機動性不足，這時便可調高ISO連環捕捉千分之一秒影像。而D3S作為頂級FX全片幅機種，連拍速度高達每秒九張，內置的緩衝記憶體更比上代多一倍，一次可連拍一百三十張JPEG或四十八張RAW，實快門狂影實冇走雞。

扭向「Q」寧靜快門模式後，可減低快門聲響，偷拍都唔怕被人發現。

機背改良了LiveView和十字轉盤按鈕，想拍高清影片時一按搞掂。

D-Movie拍片 優化影像設定

隨着高清拍片普及，Nikon在新一代數碼單反上已陸續加入D-Movie拍片功能，D3S更藉着高FX全片幅和高ISO規格優化影像效果，只要啟動新設計的LiveView和轉盤按鈕，便可拍出1,280×720每秒廿四格的影片，配合不同鏡頭營造景深效果。最正是D3S除了可直接剪片外，連RAW相片都可即時在機內處理，調校白平衡、加減曝光就倍覺方便。

除了USB、收音咪和電源插頭外，還加入HDMI輸出介面，直接駁電視睇片。

連RAW相片都可在D3S內進行後期處理，或調校白平衡、色彩和曝光等設定。

十萬ISO摸黑實拍見得人

在昏暗的環境下開盡ISO 102,400，毋須閃燈便可以高速快門影相和拍片，質素都算見得人，狗仔隊看來又有新武器。

機檔案

感光元件： 1,210萬像素CMOS

快門速度： 1/8000至30秒、B快門

連拍速度： 每秒9張（DX格式下每秒達11張）

ISO感光值： ISO 200-12,800（可擴充至ISO100-102,400）

顯　示　屏： 3吋92萬像素TFT LCD

其　　他： 51 點自動對焦、雙CF卡插槽、高清短片拍攝、HDMI插頭

尺　　寸： 159.5×157×87.5mm

重　　量： 1,240g