人行一份烏龍文章，估唔到能夠撻着A股，滬綜指上周重上3,500點樓上，兩市成交連日逾一萬億人民幣。到底今次A股上升，係無心插柳，抑或係上大人刻意布局？

筆者認為，經歷過七月的救市行動，A股不少貨源已盡入阿爺手中，加埋呢期金融圈打虎風聲鶴唳，唔係上大人主動出手，邊個夠膽「吹雞」炒上？上周五收市後傳來中證監話場外配資清理工作基本完成，又話將重啟IPO，上大人想將A股融資功能正常化的意圖似乎已鮮明不過。

科網股準備落鑊

展望本周，MSCI將於十一月十二日收市後公布納入MSCI中國指數的股份和權重；另有指本月開始MSCI將海外上市中國企業（中概股）納入旗下新興市場指數，市場推測阿里及百度均有機會獲納入，並可能會帶動中概股及本港科網股行情。上周騰訊（00700）及科網股似乎已來個預演，上周五港股跌市，但騰訊、金山軟件（03888）、金蝶國際（00268）均高收，且看騰訊季績會唔會有好消息。

再睇吓環保股，從事廢物處理及相關業務的首創環境（03989），在六、七月由0.6元水平急挫至0.25元後，在0.3至0.4元水平已經行咗近四個月，上周五終於出現突破，收報0.44元，升7.32%，在250日線樓上收市，成交增加。

雖然呢隻股係毫子股，但為北京首創旗下從事環保及新能源業務的旗艦，截至今年六月底止，公司環保及新能源項目共二十個，總投資額67億人民幣，其中已投入20億人民幣，估計總設計規模為年處理生活垃圾量約500萬噸及年拆解電器及電子設備320萬件。今年六月公司曾進行一供一，每股供0.45元，即係話供股股份才剛剛回升至接近成本價，若然真係上得番去，應可確認調整完成，重拾升軌。