Fundman睇市：中建材短線炒一轉

連彈兩日的港股，因為美股腳軟及中國PPI數據差到極，低開後低位表現牛牛皮皮，全日波幅得279點，恒指收21,562點跌568點，受制於20日線，但又未衰到穿10日線，後市再抽定掉轉頭向下炒，睇嚟仲係五五波。

在睇唔通揸現金的的芬佬原則下，大市成交縮到八百億唔夠，華潤置地（01109）雖然係跌幅最大藍籌，收市跌5%報18.94元，不過尋日話短博高債二線內房，走勢唔失禮，世房（00813）開11.2元，埋單收11.46元，倒升0.5%，富力（02777）低開見7.3元，埋單跌幅收窄到0.8%，報7.43元，昨日裂口開低反而成為低買機會。

影視市場起風雲

曾經被傳係股神接班人，並推介過老人家買比亞迪（01211）的李祿，旗下對沖基金喜馬拉雅資本斥1.98億元增持中國中車（01766），股市逆市升5.1%收9.67元，證明股神個金漆招牌幾夠照，哎吔門生入貨都有如此威力。

睇到單新聞相當振奮，北美起家、做串流影視做到出晒位的Netflix，出年將會進軍亞洲，包括在香港推出服務，到時收費影視娛樂市場勢必風起雲湧。Netflix近年服務席捲歐美澳市場，同時亦係北美最流行網上電影平台，主攻月費提供電影以及原創電視劇，早排在下到美加旅遊，多得朋友借戶口一用，得以用手機、平板以至電視登入大煲特煲，一次過睇番晒多年來想睇的電影，方便程度以及用戶體驗之佳，實在贏香港用開的自選服務幾皮。

睇番佢股價，實在悔恨大鄉里出城出得太遲，Netflix（代號:NFLX）股價三年內升10倍，從佢依家過200倍的往績PE，加埋股價升勢之狂，有投資經驗的大抵都會猜到，華爾街大孖沙幾咁睇好呢間公司。

話時話，近半年幾間財雄勢大的影視娛樂巨企，都對香港市場食指大動，年初美國Fox話嚟香港拍劇，出到過百萬美金一集的天價，早幾日傳內地樂視以數以十億破頂價投得英超香港播映權，加埋Netflix進駐，可以想像一年半載，香港無論免費同收費電視市場都肯定翻天覆地，網絡電視殺到埋身，攞唔到牌做唔到電視大亨變成轉做網購的港視（01137），對住呢班腰纏萬貫的對手，或者真係塞翁失馬焉知非福。

海螺還原基本步

七月底筆者曾推介過水泥股，一來係第三季水泥價有見底迹象，其次係上半年發改委配合救經濟，狂批新投資項目，大部分係大興土木的基建投資，年底前水泥需求勢必有轉機，像龍頭海螺（00914），升過又跌過，推介時約24元，抽過上27.95元，八月底中資股山泥傾瀉最低落到20.3元，近日市況好番，又還原基本步，尋日收24.8元。

海螺唔係唔好，只不過反彈市唔知捱到幾耐，如果純粹博水泥市道回穩，短炒一浸，近期睇見隻高槓桿的中建材（03323），都有留意價值。

上半年水泥價與需求雙雙下瀉，一如其他行家，中建材業績倒退五成六，賺得7.9億元人民幣，公司高管透露，七、八月因應傳統旺季推動，水泥銷售價量齊升，毛利率亦然，另外中建材對比海螺，屬於高債一族，較能受惠於內地減息的趨勢，短期利好的消息齊備，股價相比七月底時接近6元水平，依然低出一截，近日在4.06元有見底迹象，連出五日陽燭兼見成交級級上，相當對辦，短炒可以諗諗，博至少回到七月底的股價水平。