發展商早十幾年已經密密手收購舊樓，依家可算係收成期。今年話咁快到年尾，劉Sir計一計數，原來今年到依家申請強拍個案有24宗，比舊年全年暫時多咗50%，但比起一一年同一二年，每年有近五、六十宗嚟睇，仍差一大截。今年由於有部分大型項目撐住，所以呢批物業估值加埋逾100億元，同舊年約45億元比多咗超過一倍。

今年發展商申請強拍個案大增，其中恒地在西半山美麗臺項目最為矚目。（資料圖片）

第一太平戴維斯陳超國預料，明年申請強拍的步伐會減慢。（資料圖片）

2004王至今申請強拍個案

今年部分申請強拍個案

市區靚地難求，加上唔少四十至五十年樓齡嘅舊樓，好多在興建嘅時候都未用盡地積比率，所以重建價值好大，近十幾年已經有唔少發展商喺舊區尋寶。

恒地積極 美麗臺矚目

二○一一年同一二年分別有46宗同57宗申請強拍個案，而今年到依家已有24宗，雖然比起高峰期少咗約48%與58%，但都係有強拍以來第三多申請嘅一年。

今年最積極係恒地（00012）或相關人士，24個申請中，佢哋獨資或合資項目佔咗8個，呢批項目估值加埋近62億元。

其中最矚目係西半山美麗臺項目，呢個項目由恒地同新世界（00017）合作收購，已經搞咗好多年，今年都密密增購咗幾個單位，令到持有項目嘅業權份數去到逾84.6%，成個項目佔地約5.2萬方呎。

測量師初步估值逾29.95億元，若以地積比率9倍計，重建後總樓面達47萬方呎，將係區內最大重建項目，有望取代早前土地審裁處頒下判書，可以強拍嘅西區皇后大道西450至456G號西環大樓，成為史上最大宗強拍個案，而西環大樓都係由恒地收購，獲准嘅拍賣底價29.57億元。

收購成本增 明年勢緩

今年強拍申請多，但明年就唔樂觀，事關政府推辣招稅後，收購舊樓成本增加，加上樓價飆升，小業主叫價硬淨，部分發展商話收購舊樓已經唔係咁有肉食。

第一太平戴維斯估值及專業顧問董事總經理陳超國話，最近強拍申請有加快迹象，但其實不少項目早前已開始收購，最近先申請強拍埋尾，加上政府主動推地，有潛力進行收購嘅舊樓項目已買少見少，估計明年申請強拍步伐會減慢。