中州證券（01375）繼於十月得到上交所同意開通港股通業務交易權限後，上月更被納入大摩MSCI小型股中國指數，本月又獲中證監受理其A股發行申請，好嘢接踵而來，懶理之前社保基金沽貨，尋日以全日高位兼新高5.6元收市，升幅18%，較招股價2.51元升逾倍，後市可衝6蚊關，阻力位6.2元，支持位5蚊。

中州從事經紀、投資銀行業務、投資管理及其他創新業務，九月份利潤再創新高，錄得淨利潤1億元人仔，按月及按半年月均各升91%及2.4倍，原因係融資融券、股權質押融資等資本中介業務規模擴大令利息收入大增、A股市況活躍令經紀及自營投資業務收益大增、資產管理計劃淨值回升沖減預計負債，同埋完成投行項目確認收入。

睇番尋日爆上原因，內地股市升勢猶如火箭，滬綜指勁升83點，收報2,763點，一眾券商股自然如魚得水，而且公司回歸A股計劃有進展，早前透露規模80億至100億元人仔，當年由於A股IPO暫停，所以先至決定先H後A，並預期於一六年初完成上市，相信隻股仲有排炒。