灣仔近年有唔少重建項目展開及落成，帶動區內住宅同商廈價值上升唔少，過去一年幾，發展商及投資者已密密喺區內掃入地盤或全幢物業，劉Sir數數手指，期內最少有8宗涉及地盤易手或舊樓併購個案，加埋金額逾43億元，當中以皇后大道東同鄰近一帶成交最多，而最大宗成交係以逾11億元賣出嘅駱克道福利商業中心。

皇后大道東近年有不少重建項目展開，勢帶旺灣仔住宅及商廈交投。

第一太平戴維斯陳超國認為，灣仔為傳統鬧市，吸引財團在區內搵發展機會。（資料圖片）

過去一年部分發展商在灣仔區尋寶情況

港鐵金鐘站將變身成為超級車站，預計會帶旺灣仔星街同皇后大道東一帶，上述8宗地盤交易或者舊樓併購有新進展嘅個案，大部分集中喺皇后大道東，好似有區內「大地主」之稱嘅合和實業（00054），今年五月就申請強拍收購咗好多年嘅皇后大道東161至167號，喺法庭文件睇到，合和旗下公司持有上址逾98%業權，測量師估值逾3億元。

而一向積極喺金鐘太古廣場附近物色發展機會嘅太古地產（01972），正搞緊併購嘅皇后大道東寶華大廈，今年收購進展都唔錯，市場估計已經收購咗逾80%業權，已符合到申請強拍嘅最低要求，估計涉及收購金額暫逾5億元。

泛海駱克道入貨收租

另市傳亦係由太古購入嘅月街5號舊樓，全幢成交價約5,000萬元。

其實，唔少發展商都喺灣仔區尋寶，泛海國際（00129）最近就以11.05億元買入駱克道福利商業中心，泛海國際執行董事關堡林話，呢幢商廈與集團揸住嘅匯漢大廈，當年其實係同一個合作發展項目，屬於同一個地段，擁有同一張地契，依家終於成功統一，暫時諗住翻新用嚟長線收租，遲啲有需要先考慮重建。

萬科獨資買昌發大樓

除咗本地財團之外，內地發展商都唔執輸，內房龍頭發展商萬科置業（香港），就以8.6億元買入聯發街12至24號昌發大樓，係集團喺香港首個獨資發展項目。第一太平戴維斯陳超國認為，灣仔係傳統市中心，租金同售價都有保證，好多財團希望喺區內搵發展機會，遲吓啲新項目陸續落成，相信會有一番新景象。