Fundman睇市：國美有力升多浸

今浪大市突破，除了部分不見經傳的三四線股狂升之外，很大部分資金追捧重磅藍籌股份，說穿了，歐美股市經歷了相當漫長升浪，港股如今才出現追落後，筆者主觀認為今浪的目標，不會是24,111點這般保守。

如果新一批iBond（04222）預期有3.5至4厘回報率，投資者也趨之若鶩，掉番轉頭諗，藍籌股股息回報現時有3.8厘，一啲都唔算貴，太平盛世底下，上市公司盈利及派息正常有穩定增長，反觀iBond只可以睇住通脹望天打卦，悶了半年的港股，在預期下半年滬港通可以進一步北水南調底下，實在無唔炒的理由。

大藍籌率先發威

基於早前美銀美林一項基金經理調查顯示，基金上月淨持現金比例達到4.5%，是有紀錄的第二高，如果股市技術走勢突破，以及憧憬下半年港股可以追補外圍升幅，照道理最先受惠會係一批有足夠交易深度，可以畀基金迅速補充倉底的大型藍籌，到升浪中後期，先輪到中型股及蚊型股發威，如果真係無特別心水板塊的話，較安全的做法可以揀番盈富（02800），甚至乎同股市氣氛同步的港交所（00388）。

國美電器（00493）發盈喜，預告上半年一般性業務淨利潤按年大幅增長超過八成，期內淨利潤率預料超過2%，加上1億元（人民幣．下同）的非經常性收入，上半年盈利將錄得1.1倍以上增長。以一三年中期賺3.22億元計，意味今年盈利應達6.76億元，達到綜合大行預測全年盈利12.85億元的52.6%（或扣除一次性收益後的44.8%）。

淨利潤率重見2%

以國美第一季業績及電商業務情況開始好轉的趨勢，今次盈喜是意料之中，但也有些少意外驚喜，主要是淨利潤的恢復比市場預期快，上一次的國美半年業績能夠交出2%以上，經已係一一年下半年的事。

昨日國美股價升6.9%，收報1.39港元，投資者反應比筆者預期好。早前提過，近年國美賣點是電子商貿發展，但隨着京東商城（JD.com）五月到美國上市，機構投資者要買網購家電商，多咗個更好選擇，令國美定位有點尷尬。睇番京東以19美元招股，本周二收28.54美元，短短兩個月，累積升幅超過五成。

不過，國美也不至於一無是處，以一四年15.1倍PE計，估值比一○至一一年未受網購電商衝擊前的18至20倍相對便宜。基於淨利潤率回到2%樓上，撇除電商發展不看，單是傳統銷售模式生意，亦值得享有業績插水前的估值，保守一點按18倍計，目標睇1.65港元應該唔算過分。