佛誕假期番嚟，港股依然無起色，恒指尋日跌230點，收報21,746點，主板成交622億元，比假期前多近五成，過千隻股票錄得跌幅，單係一隻騰訊（00700）就佔咗恒指65點跌幅。

廣汽季績對辦，全年有望交出市場預測的五成以上盈利增長。（資料圖片）

太陽日誌2014/5/8

綜合大行預測廣汽業績（人民幣）

身邊好多人問騰訊博唔博得過，但要知道，股票從來好少在合適價格內上落，反而經常在超賣與超買之間遊走，之前高位646元的騰訊，相當於一四年44.8倍PE，以37.8%增長（先唔講同過去三年平均28%比較係咪太樂觀）計，PEG（市盈率/增長率）1.18倍，超出1倍的公認合理水準。近日的跌勢，估值番到去33倍PE，PEG落番0.87倍，客觀事實係比之前合理，但夠未呢？

搵番網絡股未有咁癲的一二年，騰訊在150至263元間上落，巧合是高位的PEG1.17倍，同今浪高位接近，反之低位只係0.67倍，套用於今日，即係可以去返25.3倍一四年PE，相當於362.5元，所以你問騰訊股價跌咗舊幾水買唔買得，真係唔識答你。

零售股跌勢擴散

五一假期個人遊數字與消費一樣失色，靠遊客食胡的濠賭股跌到一仆一碌，零售股跌勢由金飾股蔓延開去，周生生（00116）及周大福（01929）跌2.4%及1.2%，而服裝股慕詩（00130）跌3.2%、I.T（00999）跌3.3%，包浩斯（00483）同堡獅龍（00592）跌4.6%、利邦（00891）跌4.9%。

撞啱出中期業績預警的佐丹奴（00709），尋日急挫16.6%。睇番舊年賺6.63億元，往績PE10倍，街外舊有預測估全年賺8億至9億元，睇怕已經無望。服裝零售過去幾年全靠個人遊旅客消費，如果訪港人次見頂，加埋消費因內地經濟轉弱及人民幣匯水掉頭走，佢哋好難再頂得住遊客區的天價舖租。下一輪會唔會到遊客區大業主好似鷹君（00041）、九倉（00004）被沽？看來捧場客短期都係避一避好。

收市後滙控（00005）公布季績，稅前盈利下跌20%，是大行預測15至19%跌幅下限，倫敦早市股價應聲跌超過溫巴仙。

車股調整近尾聲

基金股中，華晨（01114）是尋日少數的逆市奇葩之一，抽升5.7%，收報12.24元，事緣德國寶馬季績中，投資收益勁升1.58倍，至2.25億歐元，創單季新高，當中又大部分來自華晨寶馬項目。尋日交銀調高華晨今明年每股盈利預測4.2%及1.6%，目標價睇16元；但瑞銀就認為唔使太興奮，因為涉及寶馬對非華晨合營以外的投資項目的會計變動，睇13元建議中性。姑勿論點，自從反貪及向環境污染宣戰後，車股靜咗一段時間，稍有好消息就反應咁大，多少見到調整可能已經去到尾聲。

個多月前提過的廣汽集團（02238），股價上過9元樓上又碌番落嚟，可以諗番佢。早前集團公布季績對辦，毛利率改善、自主品牌損失減少，加上幾間與外資合作的合營公司收入大豐收，全年交出市場預測的五成以上增長，並非過分樂觀。

中期而言，今個月廣州本田推新一代FIT，年底再推另一款小型SUV Vezel，有助維持銷情，長線有一五年的三款Cherokee Jeep車系，早前車展反應唔錯，未來兩年業績增長較具保證，一四年9.4倍PE，尋日插落7.73元收，諗得過。