美國非農數據比預期好，令市場相信美國經濟繼續復甦，聯儲局亦不會放慢收水步伐，嘗試炒減慢退市的聲音大減。

歐元兌美元走勢

數據理論上利好美元，但美元反彈力度都唔夠強，美匯指數收市仍喺80樓下。對於失業率回升，但非農業新增職位仍持續有十幾萬份增長的怪現象，更加係聯儲局「最期待的畫面出現了」，失業率暫時遠離加息門檻，更令聯儲局大條道理維持息口喺低位，暫時未係時候炒加息，令美元未有動力爆上。

歐元一舉升破一條由金融海嘯前歷史高位1.6030開始向下延伸的長期下降軌，執筆時匯價仍在高位，似乎短線沽壓不大。一旦歐元破位上升，到時美元就會出現一個下跌浪。

睇基本因素，歐元區經濟只是有復甦訊號，而歐元過強，似乎進一步壓抑歐元區過低的通脹，暫時都仲係說服唔到自己歐元有條件升破呢條咁重要的下降趨勢線。因為一旦確認突破就唔講得笑，可能係一個中期升浪開始，明顯阻力就係1.40呢個心理關口，進一步睇就係1.4250。

今個星期數據唔多，比較重要係星期四的二月份零售銷售，如果就業市場好轉，理論上零售銷售都同樣會改善，有利美元反彈，但喺星期四前歐元睇嚟有機會繼續試高位，可能要掂一掂1.40先肯罷休，相反要跌穿1.3720才確認轉勢，歐元淡友惟有打守勢波。

GMO CLICK環球通副總裁 陳健豪