執筆時，仲未清楚馬航客機失蹤事件到底是意外、恐襲還是劫機，但有昆明車站襲擊事件在前，難免令股市向壞方向去想。

雖說春節因素扭曲出口數據，但今年內地經濟表現仍令人憂慮。(資料圖片)

太陽日誌

昨日可見，期指開市頗混亂，第一分鐘三月期指由22,363點急隊至22,100點，幅度達263點，面對事件真相未明，期指開市一刻笨豬跳之後，大市全日跌得頗有秩序，至少唔算得上是恐慌拋售，73隻股份創五十二周低，同時創新高股票亦都唔少，有53隻。

恒指啱啱穿250日線，基金經理仲有秩序地減磅，樂觀睇，經過一月中新興市場走資潮之後，大孖沙要沽都沽得七七八八，是以昨日指數跌近400點，但成交反而見縮減，主板由上周五的695億回落至680億，後市可能會陰陰乾，而未必出現急跌。

舊經濟股冇人吼

不過，如果睇埋行業表現，悲觀睇法係基金始終死抱住環保能源、網絡等新經濟板塊，懶理其他舊經濟股死活，市場兩極化，剩番貴到極的概念股，同平極都無人吼的傳統經濟股，對大部分唔願意損失機會成本的玩家來說，風險無疑更大。

A股跌穿2,000點心理關口，滬綜指收報1,999點，跌58點。市場清一色負面消息，先係人行見死不救上海超日太陽能，開了違約先例，令人擔心民企違約仲會陸續有嚟；馬航失蹤原因未明；兩會會期剩番兩日，供市場幻想空間相對細咗；IPO重啟真空期快將結束，抽走市場游資。

人民幣兌美元又再跌過，尋日最低見6.1460，但都唔及二月出口按年急跌18.1%震撼。之所以同市場預期升10.6%咁南轅北轍，雖則話舊年農曆新年在一月份，今年就喺二月，以一、二月合計，首兩個月中國出口只係跌1.6%，無18.1%跌幅咁驚嚇。

人行鬆手唔容易

不過，對比去年第四季的7.4%增長，踏入一四年，中國出口數據經已肯定開壞個頭，全年點樣保住7.5%GDP增長？靠人行放水？但睇尋日收市公布的二月新增貸款6,445億元，又低過市場預期，眾多不利因素加起來，A股（甚至本地的國企股）短期想有運行都幾難。

不過，股市唔會直升或者直跌，跌到一定程度總會有所反彈，二月內地CPI升幅回到2%，創十三個月新低，本來畀到人行更大空間手鬆一點，不過國際農產品價格近期掉頭向上，分析師估三、四月食品價格回升又會令CPI反彈，睇情況人行要透過減存款準備金率鬆番啲錢出街，最快都要第二季中，睇落三月到四月初個市都幾難捱。

尋日個市無乜焦點，雙馬概念股就特別顯示出佢地高強的吸金力，中信21世紀（00241）升近1%，收報7.37元。老實講，筆者對佢提唔起投機興趣，只想直接跳去故事結局，睇一班股市魔術師，將來用乜方法填補市值與公司資產值之間近十倍差距。係用超筍價塞一堆生意入去？抑或股價在科網熱結束後跌番落嚟？

另一隻華南城（01668）尋日升8.7%，收報4.73元，差些少就挑戰被馬化騰寵幸之後的4.99元高位，缸邊客好似早有共識，認為佢會好似上星期的中信21世紀一樣，破位衝多一浸。