魚缸Blogger：時代集團估值吸引

繼去年十一月後，畀美銀美林再上調目標價嘅時代集團（01023），尋日升逾1%，收報4.48元，成功收復晒多條平均線，技術走勢轉好，食住MK袋熱，唔大貪先睇5蚊。

時代為全球高檔及奢侈品牌手袋、小皮具及旅行用品製造商。截至去年六月底止全年純利增長5.1%至4億元，毛利率亦升1.1個百分點至23.3%，原因係製造業務成本控制加緊，同埋零售業務進一步擴展。

另外，美銀美林亦話呢隻股估值吸引，現價較同業折讓三成，加上第二大客仔Michael Kors第三季業績好過預期，相信來自佢嘅業務處於高增長，公司銷售及利潤保持穩定增長，估值自然仲有上調空間。