魚缸Blogger：榮陽實業小注短炒

一掛牌就潛水嘅榮陽實業（02078），近期因為新iPhone消息而反彈，尋日逆市再升1.7%，收報1.78元，有見佢幫富智康（02038）生產平板電腦及手提電腦鋁底盤，食住蘋果概念，不妨小注怡情。

榮陽截至今年三月底止六個月收入增長9%至12.93億元，純利增長29%至2.49億元，毛利率亦由25%升至30%。不過，由於近月主要客戶的電子產品配件訂單大減，同埋澳元貶值拉低出口至澳洲的建築及工業產品利潤，公司預期截至九月底止六個月綜合盈利將比上半年大幅倒退，年度業績亦受影響。榮陽亦有營銷「澳普利發」品牌產品，收入佔比一成，隨住公司積極開拓分銷網絡，話唔定可以拉上補下。

睇番幅圖，今年二月上市以來，股價好似食咗瀉藥咁，期間受中績帶動坐過吓過山車，但距離招股價4.13元路途遙遠，睇怕業績因素暫時反映得七七八八，短炒目標睇50日線1.93元。