本地零售市道近期有所轉淡，或抵銷領匯物業升級帶來的效益。(資料圖片)

中央為貿易數據去水分，長假前內地市場流動性顯著趨緊，未來經濟數據可能會逐步以「真身」示人，多家大行開始調低中國經濟增長預測，高盛更預期喺二○二○年前，中國經濟增長進入「辭八迎六」年代。上周五恒指反彈，滬綜指亦以接近全日高位收市，但國指卻不敵淡風，先升後跌，已連跌十二個交易日，反映壓力未消。喺預期六月份以至上半年內地經濟數據只會差唔會好，若然月底半年結魚缸現粉飾窗櫥效應，持重倉而未及逃生者，宜好好把握減磅機會！

本地零售市道近期有所轉淡，或抵銷領匯物業升級帶來的效益。(資料圖片)

上周四地產股開始出現反彈，上周五亦靠穩，係咪經已跌完，阿莊亦唔敢下定論，畢竟今年上半年發展商嘅新盤銷售肯定差，雖然樓價止跌，但樓市成交依然不振，至今為止發展商第三季新盤銷售部署亦尚未明朗，即使地產股股價喺低位回穩，暫未見得有大幅反彈嘅條件。

受累零售市道轉淡

提及地產股，唔爭在睇吓啲房託。領匯（00823）近月基金單價格急挫，累跌逾兩成，上周五始現反彈，收報39.1元，升3.17%，總算重上250日線樓上收市。之不過，阿莊認為，近月領匯已扭轉了過去一年嘅強勢，相信是次調整浪才剛開始。以其現價息率3.7厘計，房託中有其他更好嘅選擇，如越秀房託（00405）息率達8厘。更何況若然長債息率持續上升，領匯以息誘人呢一招顯得更不中用。次季以來零售市道轉淡，加上勞工成本上升，亦抵銷部分來自物業升級所帶來嘅效益。總體而言，今年嘅整體展望有別於往年嘅無風無浪，避險功能正在「褪色」。

此外，政策顯示呢幾年樓市大升浪已人為地畫上句號，來自資產升值嘅效益已告一段落，領匯嘅物業升級效益要打折。經歷今次跌市過後，即使往後股市有新嘅利好因素出現而回升，手持現金要揀值博股，首選相信唔會係房託。再睇圖表，其周線圖重要支持位喺50日線39.1元，本周可以話暫時險守，若然月內確認失守該線，提防將有更大嘅調整在後頭。手上未有持貨，未來六個月都可以唔使睇領匯；持貨者則宜逢反彈套現，現金為王。

順帶一提，中國公共採購（01094）上周五曾高見0.78元，已按均價0.76元沽出食胡。