將軍澳南區今個星期五又有地截標，地皮係將軍澳第68B1區限量地，劉Sir擔心上星期何文田豪宅地成交價唔係咁好，會唔會對幅地有影響。但有測量師老友話區內發展成熟，唔會有影響，市場估計呢幅政府主動增加發展密度嘅地皮成交價最多37.77億元，料區內「插咗旗」嘅新地（00016）及會德豐地產等入標機會大。

高緯環球 張翹楚

屯門掃管笏第55區地皮，總樓面約4.84萬方呎。(資料圖片)

兩幅住宅地本周截標

呢幅將軍澳第68B1區限量地，係區內4幅政府主動增加發展密度地皮嘅其中一幅，地皮可以起樓面超過82.1萬方呎，住宅樓面佔約67.9萬方呎，提供單位唔可以少過840伙。

高緯環球張翹楚對劉Sir講，上個星期何文田佛光街豪宅地成交價雖然差少少，但相信唔會對嚟緊截標嘅將軍澳限量地造成太大影響。佢解釋，將軍澳南近年都批咗唔少地皮，區內發展都愈嚟愈成熟，所以地價唔會同已經賣出嘅地皮有好大差距。

三年幾售10幅地皮

劉Sir知道，近三年多以嚟，將軍澳南已經賣咗多達10幅地皮，每幅成交樓面呎價由約3,810至4,929元，即將截標嘅第68B1區限量地，市場估計樓面呎價就約莫4,300至4,600元，即係屬於區內土地成交地價範圍以內，屈指一算地皮估值約35.3億至37.77億元。

今次截標嘅限量地投資額唔算好大，劉Sir都估計入標反應應該唔錯，以區內已經有唔少地嘅發展商投地意欲最大，好似先後攞到區內4幅土地嘅新地，同有3幅將軍澳南地皮嘅會德豐地產，睇個勢都會繼投得何文田佛光街豪宅地後，再度出手競投呢幅限量地。而嘉華國際（00173）及信置（00083）都係入標熱門財團之一。

掃管笏細地估億九

其實同日截標仲有另一幅地皮，不過規模就細好多，呢幅屯門掃管笏第55區嘉和里山路與青山公路交界住宅地，總樓面約4.84萬方呎，市場估值最多約1.935億元，樓面呎價約莫4,000元。