筲箕灣道121至131號地下5號舖，現由粉麵店以每月約9.8萬租用。

近排商舖大額買賣雖然少咗，但一線零售區內舊街舖，業主一向都好少放賣。不過逐漸轉型為中檔食街嘅尖沙咀厚福街，其中2A號地舖，聽講業主揸咗近四十年，依家放盤叫價約1.35億元，有代理話，同佢買入價高出約220倍。西灣河筲箕灣道121至131號地下5號舖上月中左右以5,100萬元賣咗，聽講新買家有機會係現有租客。

筲箕灣道121至131號地下5號舖，現由粉麵店以每月約9.8萬租用。

近期商舖放售及買賣個案

劉Sir收到世邦魏理仕一份放盤資料，厚福街一個依家由茶餐廳租用地舖，面積約1,500方呎，業主叫價約1.35億元放售，收租回報可逾2.6厘。該行話，上址業主七十年代中左右購入，成交價大約61萬元。舊年年底該街道H8全幢銀座式商廈地舖以1.5億元賣出，呎價都係約4.6萬元左右。

土瓜灣舖短炒賺175萬

劉Sir睇番土地註冊處資料，上述筲箕灣道地舖現時租金9.8萬元，租期由去年九月至一五年共三年，新買家係騰至有限公司，以成交價計租金回報率約2.3厘，依家間舖租畀香港仔南記粉麵。有代理同劉Sir講，新買家有機會係原租客，不過記者問過佢間地舖嘅一位黃姓經理，佢話唔知詳情。

有超市經營商都睇好商舖，淡市下仍入市，有代理爆料，華懋嘅御門．前地下C號舖獲出價9,500萬元洽購。另有買家向投資者「物流張」購入土瓜灣譚公道16至26號地下5A號舖，涉資約2,050萬元，原業主四個月帳面袋175萬元，賺幅約9%。另土地註冊處資料指，尖沙咀金馬倫道5號地庫錄買賣備忘約5,190萬元。

金鐘美銀放售索1億

另一方面，商廈大樓面需求仍然有有捧場客，唔少業主都肯淡市下放售，中原蔡德寶話，金鐘美國銀行中心26樓06A至06C室三相連單位依家放緊賣，意向呎價2.6萬元起，面積加埋3,600多方呎，涉資約1億元，其中06B室業主係紀惠集團廖偉麟。