Fundman睇市：航空股起飛前召集

港股逐漸收復失地，並有趨勢追補過去兩三個月外圍股市的升勢。前晚美股因為耐用品訂單數據出現近七個月以來最大跌幅，拖累道指偏軟，不過港股無受影響，尋日恒指高開後最多升過303點，受制於50日線阻力，收市前回順，升218點，報22,401點，成交630億。反而升跌股份比例，由周三的71對29，回到52對48的均勢，相信同上星期低位21,423點起步的反彈，開始逼近一些技術阻力所致。

A股困在2,165至2,250點之間快三個星期，尋日滬綜指跌18點，報2,199點。留意到人民幣同業拆息近排異動，隔夜息由上周初的2厘升到尋日的4.29厘，一星期亦由2.9厘左右，升至尋日見5.02厘，創埋十三個月新高。係川震影響？抑或人行的收水行動影響？水緊情況短期對A股唔多有利，一日滬綜指唔升穿2,250點阻力，暫時都未可以當轉勢。

A股仍缺炒作主題

近日同位A股基金經理閒談，佢直言今年雖然已經踏入第二季，內地政局塵埃落定，不過佢話仲未搵到今年A股有主題去炒，尤其低處未算低的估值，藉口用得太多，經已唔足夠說服客戶落注。客觀睇，近日電力需求增幅放緩，意味工業及出口業復甦似有還無，商業銀行不良貸款連續五季上升，加埋習近平主席的反貪，令到一眾奢侈消費及餐飲業門庭冷落，唯一精神的是與民生息息相關的消費板塊，例如蒙牛（02319）死對頭伊利A，股價由年初累積升幅三成九，叻過晒啲茅台、五糧液。

最近睇到東航（00670）試用內地特產「地溝油」轉化生物燃料試飛的新聞，假如有朝一日，真係有機會全國性使用，肯定係人民福祉，地溝油搵到一個比炒菜更佳的用途。

尋日內地減成品油價，分析預測話航油好可能短期跟減，對航空股有利。筆者早前錯估形勢，怕H7N9疫情對航空業的傷害，有機會同○三年沙士相提並論，不過睇嚟筆者又係杞人憂天。不得不提，燃料成本外另一項對航空股有利因素，係人民幣匯價尋日兌美元見過6.1671的匯改新高，今年累積升值1%，與去年七月比較更累積升值3.4%，走勢持續的話，對航空股匯兌收入有好處。

從市帳率比較，東航及南航（01055）都處歷史低點，一三年預期市帳率分別為1.11倍及0.89倍，同沙士至今的歷史中位數1.37倍及1.29倍比較，折讓19%及31%，部分有利條件已出現，看來就只差疫情受控以及搭客量回升數字，股價將可以順利起飛。