

租/售 | ![]() |
租 售 | |
樓盤由property.hk提供 |
Fundman睇市:舜宇光學 升浪未完
隔晚道指又創收市新高,恒指尋日重上22,000點關口,主板成交稍增至593億元。北韓揚言昨日射導彈,但日韓股市未驚過,中國評級被惠譽下調,但內地股市未受影響,人民幣照創新高,西班牙被穆迪威脅下調評級亦冇反應,禽流感更加冇乜人提,呢兩日壞消息突然煙消雲散,但恒指仍未升穿下降軌,始終未能安心。
班大孖沙喺派完成績表之後再度增持,對大市氣氛有一定幫助,超人同四叔都係積極分子,結果長實(00001)、和黃(00013)同恒地(00012)等均有追捧。不過今勻業績過後大股東增持案例唔算多,可能覺得現時自己隻股票仲未算抵買。除咗和黃升逾4%之外,保險股低位回升,大笨象滙控(00005)突然發力,內房股抽高等,均成為升市火車頭。
又一隻殼股狂升!恒力商業地產(00169)復牌升足4倍幾,公司賣盤畀房地產商大連萬達,一直冇人吼之股份,街貨亦唔慌多,所以升起上嚟如入無人之境。依家殼價嗌到4、5億銀,主要係上市條例收緊,第四季開始保薦人要負上刑事責任,而內地有超過600間公司排緊隊上市,因此買殼「走後門」除笨有精。近年上市嘅細細粒新股有好多具有賣殼條件,但能否一箸夾中要講命水。
歐洲千家光伏企業要求歐盟唔好制裁中國,因為損人終會害己。歐洲唔同美國有頁岩氣幫手,天然氣要靠俄羅斯揸頸就命,德國又話放棄用核電,制裁中國上游企業等於用石頭砸自己腳。太陽能股近期大上大落都幾難玩,但燃氣股就一直順風順水,近期更炒加價潮,多個城市都有民眾排隊或囤積天然氣,但要呼吸新鮮空氣,就自然要捱貴「氣」。
瑞聲科技做硬贏家
智能手機設備股亦唔輸蝕,昨日見瑞聲科技(02018)股價再創五十二周新高39.15元,收報38.75元,今年以來股價累升幅度已逾四成,可謂大幅跑贏大市!主要原因係公司除咗一直向蘋果公司供應手機零件外,去年更成功取得三星嘅訂單,今年蘋果公司同三星都有新手機產品推出市場,兩個產品邊個勝出,瑞聲都係大贏家,股價迭創新高不無道理。
此外,舜宇光學(02382)股價亦不斷尋頂,由今年初5元邊升到上近期高位見9.7元。瑞信剛發報告,將舜宇一三至一五年度預測每股盈利調高3.1至9.9%不等,主要預計其手機相機模組銷售增長佳,且本季起開始向三星大量供應手機鏡頭,故將其目標價上調至11元,即係話較現價仍有15%上升空間。所以話,喺魚缸搵食亦要因時制宜,好似呢啲市指數反覆偏軟交投淡靜,難搵食兼要食驚風散,反而睇準個別行業形勢揀隻實力股坐定定,贏面更高!


