Fundman睇市：博反彈 不宜過勇

周末禽流感未出現擴散，只係華東新增零星案例，加上美股跌唔落兼ADR做好，原本以為港股昨日至少彈番一、二百點，但點知恒指開市未幾即再創今年低位21,612點，埋單仍微跌8點。好多股民亦抱住觀望心態，所以昨日成交得580億元，沽空比率降至一成以下，牛熊證成交增55%至82億元，27隻恒指牛證被宰，若以牛熊證收回價分析，大戶再向下殺誘因不大。不過，博反彈亦只可量力而為，因為禽流感及金正恩屬「不可控制因素」。

A股昨日復市，滬綜指最多跌近2%，但收市跌幅收窄至0.6%。其實內地股市利淡消息唔少，禽流感、兩韓局勢緊張、北京二套房貸收緊，台灣昨復市亦大跌2.4%，究竟係A股反應遲鈍，抑或港台反應過敏？

日圓跌至98.5，離「破百」已不遠矣，日經指數大升358點，再破萬三關，日本三月服務業景氣判斷指數升至57.3紀錄新高，日圓貶值短期令經濟有改善，但藥力是否持久仍要放長雙眼睇，暫時全球股市係「雙贏」局面，美股同日股都可以也文也武。

今日內地會公布三月份CPI，市場預測會回落到2.5%，而出口已連續三個月錄得高增長，所以未來兩日有機會「炒數據」，但港股仍係彈唔起令人失望。內地今年通脹似乎風險不高，商品價格至今仍然偏低，加上今次H7N9施襲拖低肉價，唔單止雞價跌，由於禽流感同黃浦江發現大批死豬時間不謀而合，所以好多人對豬肉亦避之則吉，對CPI影響最大嘅豬肉價格自春節後持續回落，而豬肉股雨潤（01068）昨再創4.32元新低。

航空股後市未樂觀

昨日下跌股數仍多過上升股數，主要見弱勢股反彈，前20位升幅股票都升超過10%、前50位升超過6%，睇落相當不錯，但洗完倉應該冇咁快又炒過，屬死貓彈格局居多。飛機股低飛完又升高少少，但飛機除咗驚疫症之外，更驚祖國取締「三公消費」，坐頭等倉嘅唔少係使公費，少咗呢班大豪客都幾大鑊。

港股業績期剛過，又輪到美國及中國企業業績期，A股已經有六成公司「預喜」，最佳板塊料由電力股「冧莊」，最差板塊或係銷量與價格齊齊勁跌嘅白酒股。其中最多人關注係內銀股，中港股市估值其實由內銀股大幅拉低，今年內銀成績表未能樂觀，去年第二季內地兩次減息，今年首季淨息差肯定按年收窄，而中央近期整頓理財產品則對中小型銀行有較大的影響。至於美股業績期慣例都是升多跌少，原因是盈利指引通常偏向保守，所以美股不排除會旺埋今個月，下個月齊齊Sell in May。