Fundman睇市：滙控追得過

尋日滬深兩市有如賓虛場面，分別勁升2.9%及3.7%，成交額差不多是周二的一倍。總算教早前估滬綜指跌到1,960點，下降軌道底部已經差不多的筆者鬆一口氣。技術上，滬綜指最低限度應升至通道頂阻力，大約在2,100點附近。

A股轉勢，熱錢充裕的港股，一舉升穿多個即市阻力，幾乎由頭挾到尾，收市升470點，報22,270點，創今年高位，期指高水70點，收22,340點，係十二月期指轉倉後首次，主板成交947億，創近九個月新高。火車頭滙控（00005）預備明年出售毒資產外，終於搵到泰國卜蜂集團承接手上的15.57%平保（02318）H股股份。基本上，交易即時消除配股批散出街的風險，對平保屬好事，而對積極削減非核心投資的滙控，一鋪攞番727億，做靚份資產負債表迎接巴塞三協定，絕對是一石二鳥。尋日股價升到一年新高，但輕身上路，加埋一三年預期股息近6厘，即使今日至追，睇嚟仲未係遲。

近十年，科網及太陽能概念股，曾經炒得有幾勁，有番咁上下股齡的股民都會知，概念股吸引的地方，係無基本因素唔緊要，只要齊齊抱住「今日唔賺，將來好賺」嘅心態，樂觀情緒可無限放大。頁岩氣會唔會係下一個股市當炒概念？真係愈睇愈有咁趨勢，尤其市面選擇唔多，剛推介的山東墨龍（00568）尋日火燒冷灶大升一成三，連勝利管道（01080）及珠江鋼管（01938）都沾上概念成分，突然炒起，總之大家緊記，炒概念股要懂得睇風頭火勢，並要嚴定止蝕。

中興炒落後贏面高

港股雞犬皆升，要搵穩陣兼未開車嘅對象唔易，今年電訊設備股大落後，一來內地3G投資高峰期將過，其次係華為早輪想到美國上市，隨即被美國國會指摘佢同中興（00763）兩大巨頭威脅美國安全，時間之巧合，難怪陰謀論者都認定，美國不想中國電訊設備公司坐大，方以出口術形式打壓。

中興股價今年累積跌51%，跑輸大市一大截，現價市帳率1.33倍，接近1.2至4.7倍歷史區間的下限，不利因素應反映得八八九九。尋日中興成交大增下，股價抽升5%，事緣中興同國家開發銀行簽署《開發性金融戰略合作協議》，獲提供200億美元合作額度，突然獲批巨額融資，唔少人都聯想到盛傳內地加快4G投資，扶持電訊設備產業的傳聞，並非空穴來風，雖然暫時都係估估吓，但最壞情況都已經反映，中興應該係贏面大、輸面細的選擇。