股海實戰：南車時代動力十足

面對A股破底，市場信心低迷，上大人終於打破沉默，周二召開中央政治局會議釋放明年經濟政策訊號，A股終於來個較似樣嘅反彈，滬綜指重上兩千點大關，兩市主板總成交回升至1,470億元人仔。

阿莊尋日推介嘅東風（00489）走勢對辦，按平均價每股11.2元買入一萬股。外邊炒到慶合合，揸住嘅股票唔行好大罪，好想沽隻波司登（03998），但見佢尋日企穩，就多睇一日，唔得就要走人，擬換入上月推介嘅上實城開（00563），博整固完成再發力踢穿1.8元。

城鎮化需鐵路配合

內地新一屆政府將透過加快城鎮化來推動經濟增長，圍繞城鎮化概念嘅股份十分之多，如基建、機械、建材、內房、消費、汽車、環保等。不過，阿莊亦認同內地學者嘅講法，就係要成功推動城鎮化，必要見到「房價低、交通順」。過去兩年中央主導各地興建大量保障房，未來兩年將陸續落成，滿足到基層需要；至於交通，未來五年全國大規模擴展鐵路網成重中之重。雖然一一年溫州事故一度令鐵路發展放慢腳步，但隨着確認十二五鐵路基建投資額有加冇減，今年以來鐵路部不斷增加預算，陰霾已消除。

十月以來，市場盛傳鐵道部將喺年底前密集啟動大型招標活動，估計涉及嘅包括約350列至400列動車組招標，涉額高達500億至600億元人仔。如無意外，南車（01766）及同系從事車載電氣系統嘅南車時代（03898），今年業績已過低潮，明年可望重拾正軌。

尋日，南車股價已成功回補去年七月嘅下跌裂口位頂部，捧場客總算守得雲開。再睇南車時代，上月初，有基金減持少量南車時代股份，其股價由上月初嘅23元水平，回落至中旬低位見21.4元就跌唔落，之後又再反覆回升，尋日以五十二周新高24.6元收市。若然嚟緊喺鐵路部招標方面有好消息，其股價可再進一步回補去年七月下跌裂口頂部26.3元，回吐初步支持喺10日線23.5元。