樓市出更：豪宅唔減價難拍賣

樓市熾熱，一向主打中細價物業嘅私人拍賣場，都多咗唔少貴價物業，不過，尋日忠誠拍賣行就推出22項物業，當中過千萬嘅佔近三成，但反應冷淡，現場連同拍賣前賣咗嘅5項物業，近乎全部屬細價樓，負責人話，相信同早排銀行收緊按揭有關。

劉Sir尋日去咗忠誠拍賣，負責人鄭世傑話，喺拍賣前總共賣出4伙中細價物業住宅，及一個觀塘商場舖位，當中包括較少放盤嘅薄扶林置富花園，涉及9座中層C室以530萬元賣出，呎價約7,637元。

另外灣仔金禧大廈低層戶，以548萬元沽咗，料屬市價。至於拍賣現場只係賣出4伙，包括有北角新都城大廈住宅同長沙灣天悅廣場地舖等，其中舖位成交價較開價高逾30%售。

業主仍心雄 平10%始吸引

鄭氏話，貴價豪宅物業拍賣反應無咁理想，估計同按揭成數再收緊有關，但業主叫價仍然心雄，相信要有5至10%下調空間才吸引。

不過中細價盤反應依然唔錯，現場連同拍賣前賣咗嘅5項物業，近乎全部屬細價樓，銀行估價亦見進取；另外沙田嘉美花園同屯門澤豐花園兩個銀主盤，則因未到價雙雙被收回。

永得利一籃子搶高8.6%

尋日另一私人拍賣場亦錄成交，環亞拍賣行負責人曾傑俊稱，葵涌永得利廣場低層地下共15個車位，連租約以570萬元沽予投資者，較開價525萬元搶高8.6%，平均每個價值38萬元；另灣仔東亞大樓低層住宅，實用面積394方呎，成交價373萬元，呎價9,467元，亦搶高逾7%。