股海實戰：政治市忍手為上

承接美國QE3消息嘅餘威，上周港股喺20,500至20,800點水平徘徊，並成就一系列殼股同細價股起動。展望本周，期指月結及基金季結、亦係「十．一」黃金周長假前交易周，種種因素夾雜之下，料恒指波幅介乎20,300至21,000點。

唔經唔覺又快到「大閘蟹」上市月，股海會否再起風雲，要端視十八大行情、中央嘅維穩力度、以及美國大選前國際局勢變化。事實上，從來政治市都難玩，相信美國總統大選前，陸續有外來勢力找祖國麻煩，上大人戒急用忍，等美國政局底定。抱住戰戰兢兢嘅心態，小注怡情，並無不可，但最好等埋十一月美國大選明朗先至好有大動作。

除此之外，十八大前A股表現亦左右後市，上周洛鉬（03993）發A股融資規模被大削八成，聽聞就係中證監連夜撲火之下嘅決定，嚟緊第四季A股解禁流通市值達五千億人仔，中央托市係咪有心有力？經已連蝕三個季度嘅基金同散戶年尾有冇得標尾會？呢個十月魚缸表現頗為關鍵！

呢期港股一大焦點，乃由殼股熱炒帶動二、三線股交投回升，上周見到唔少昔日炒股都上咗升幅榜，若然今個禮拜指數繼續高企，相信股仔氣氛可望繼續升溫。

阿莊向來唔建議搞啲垃圾仙股，皆因呢班垃圾股莊家鍾意炒落唔炒上，散戶上車多數要損手爛腳。要炒不如搵啲有客觀條件支持嘅，好似隻恒基發展（00097），屬大地主旗下公司，年年都炒轉重組同私有化概念，今年就仲未炒過，次季以來股價一直喺0.54至0.6元水平上落，上周五股份成交明顯增加，達1,387萬股，乃三月廿二日以來最大單日成交股數，收市報0.57元，呢啲位上車跟炒風險有數得計。

恒基發展炒私有化

公司主要營運資產乃杭州錢江三橋嘅六成權益，但今年三月合營公司被暫停支付有關杭州錢江三橋嘅通行費，且尚未收到任何正式方案或賠償建議，故中期業績中，由相關日期起之通行費收入9,100萬元尚未確認入帳。呢個合營項目仲未擺平，基本上恒發都冇咩其他核心資產，截至六月底揸住13.26億元現金及等值，冇借貸，每股NAV0.522元，嚟緊一係就做新投資，一係就私有化或賣殼，所以確確實實搵到炒作理由。不妨留意交投，成氣候唔難上番今年高位0.68元，跌穿0.52元止蝕。