樓市出更：「波鞋街」12標對決

市建局波鞋街重建項目尋日截標，最終收12份標書，包括新地（00016）、恒地（00012）及新世界（00017）都獨資入標；有老友爆料，部分拎咗「入場券」而無投標財團，係覺得商舖部分無主導權先「褪軚」。

依個波鞋街項目之前收到18份意向書，劉Sir知道，呢個項目商舖價值連城，所以估到標書數一定唔會少，而市建局尋晚就公布有12份。係二○○四年以來，近八年最多標書嘅市建局項目，當時深水埗保安道重建項目（即豐盛居現址）共收到13份標書，最終由新地投得。

商舖「無着數」 部分褪軚

今次波鞋街項目，除上述新地、恒地及新世界，信置（00083）、英皇國際（00163）、百利保（00617）會德豐地產都獨資競投。至於長實（00001）、嘉華國際（00173）及南豐都有入標。

新地副董事總經理雷霆話，今次集團獨資入標，市區商舖罕有，故入標反應幾好。百利保地產部總經理衞振聲講，項目商業樓面逾5萬呎，就算市建局保留一半影響都唔大。

而一早表明會入標嘅英皇國際，公司高級物業主任施穎怡都話，商業優質地買少見少，項目可以配合集團零售發展，所以獨資入標，而出價都會反映番有關限制。而市場對項目估值大約25億至36.1億元左右。

但唔係間間發展商都接受到要同市建局共同持有商業部分，有老友爆料，部分財團拎咗「入場券」但無投標，就係覺得商舖部分無主導權，將來又無優先回購市建局所佔權益，索性「褪軚」唔入標，而放棄入標財團包括永泰地產（00369）、中國海外（00688）、莊士機構（00367）同九建（00034）等。

劉Sir尋日去咗鄰近地盤嘅允記集團其中一間連鎖體育用品公司，佘姓店員就話，佢哋六至七成生意額來自遊客，將來波鞋街項目落成後將會更加旺。