樓市出更：名店搶舖唔再癲

內地經濟放緩，市場相信會影響內地豪客消費意欲，大品牌租舖出手都開始無咁癲。有代理爆料，一個早排推出市場搵定租客預租嘅旺角西洋菜南街單號地舖，聽講啱啱畀間歐洲時裝品牌傾掂咗，新租每月約400萬元，比依家只係高約五成。

有代理同劉Sir講，西洋菜南街有個單號地舖，由本地時裝品牌租用咗超過十年，面積約5,500方呎，依家月租近270萬元，租期去到明年第一季尾，但係業主早排已經放風搵定新租客，意向月租加到約400萬元，心目中嘅新租客最好係鐘錶金行，或者化妝品等內地客最鍾愛嘅商戶。

新租每月約四百萬

不過，嗰個舖最終由一個歐洲時裝品牌成功預租，新月租約400萬元，呎租720多元，比之前只係升咗五成。依家唔少大商戶承租都開始好審慎，所以新租金都係有溫和加幅。近排西洋菜南街大租成交旺晒時裝店，聽講嗰條街一個雙號地舖及低層部分，面積約1.38萬方呎，本地連鎖服裝店以每月約420萬元續租，新租金升幅約1.2倍。

同時，有投資者亦伺機出貨獲利，利嘉閣邱兆康報料，深水埗青山道373至379號地下C舖啱啱「摸出」，原業主約半年帳面袋約208萬元，賺幅約14%。消息稱，張姓投資者亦密密出手，剛以近5,000萬元買入旺角彌敦道525至543號地下部分。

九龍城舖嗌近億六

至於二線民生區商舖買賣就多番，香港置業許建方話，九龍城福佬村道12至16號地下A舖連1樓，同埋地下B至C舖依家推出市場放售，業主意向價約1.58億元，呎價約2.7萬元。

受惠起動九龍東，商廈成交繼續旺。睇番土地註冊處資料，香港浸信會醫院增持九龍灣企業廣場1期3座18樓一批單位，涉資8,106萬元。

香港置業陳展岷亦話，觀塘商廈皇廷廣場31B室，以近1,660萬元賣出，呎價約8,800元，創該廈呎價新高。