股海實戰：中材具備反彈條件

美股假後低收，拖累港股走低，恒指昨日收報19,145點，跌284點，即使撇除聯想（00992）同瑞聲（02018）有配股上板，大市成交亦見增加。阿莊前日分析牛熊證街貨分布，已指出大戶可能動手屠牛，話咁快擺在眼前。技術上，恒指已確認失守10、50及250日線，且10日線行將跌穿50及250日線，走勢利淡，目前14日RSI處35，尚未到超賣水平，故不排除恒指短線有機會跌穿萬九點，落到18,800點水平才有望喘穩。

近期外資行力沽內銀股，這可視為大戶睇淡下半年中國經濟及預計A股繼續尋底嘅表現；但從另一角度睇，八月以來幾隻內銀股嘅沽空比率持續高企，空軍有計劃喺九月多事之秋做低內銀股圖利，又似乎係有迹可尋。總而言之，「中國概念」正處低迷之時，昔日基金至愛嘅內房同內銀，估值由極之偏高走向極之偏低，魚缸鐘擺效應彰顯。對於仍手持唔少蟹貨嘅股民嚟講，當然傷心；但對於手持現金嘅投資者，也許會樂見呢一刻嘅來臨，至於幾時先至係出重手買貨嘅時候，且看十年一次嘅領導人換屆會期（十八大）明朗化後，會唔會有答案。

數碼通跌得過分

前日話要留意公布業績嘅數碼通（00315），結果出嚟份業績唔係差，但股價卻向下，尋日一大支陰燭，一度插穿250日線14.98元，收報15.16元，跌8%，跌得有點過分。眼見15元有支持，遂以平均價14.98元買入一萬股，博蘋果下周公布新iPhone產品，相關概念股會有反彈，股價上唔番16元樓上又或者跌穿14.5元都會考慮先行沽出。

此外，今日又睇睇隻中材股份（01893），最近有公司高層於海外路演期間因病離世，但公司屬國企，相信高層變動不影響運作。再睇番業務表現，受累水泥行業需求疲弱，公司中報表現未盡人意係預期之內，管理層認為下半年西部地區有不少運輸項目動工，水泥價格會較上半年好，而煤價和鋼材成本下降，亦有利改善毛利表現。偏偏股價不斷尋底，尋日創五十二周低位1.79元收市，往績市帳率已降至不到0.5倍，14日RSI開始見到背馳。

畢竟板塊氣氛淡風仍盛，博行業見底復甦都從揀龍頭如海螺（00914），所以阿莊唔敢叫人撈底，只係覺得隻股真係太過低殘，技術上亦具備反彈條件，短線氣氛配合，反彈上2元唔係冇可能，但反彈完成繼續尋底嘅話，下一個大位就要睇○八年低位1.48元。