魚缸Blogger：中鐵建順勢炒番轉
內地滬綜指繼續探底，港股尋日自然無運行，雖然歐洲央行嘅買債大計爆出洩密門，但好友連托住個市嘅力都慳番，市底咁弱，最好都係留番多啲彈藥傍吓身！
尋日正路股大多數牛皮，揀股方面好考功夫。中鐵建（01186）最近發通告，話旗下公司同尼日利亞交通部簽咗份合同，約值15億美金，股份亦因為咁炒咗三日。就算撇開海外業務唔講，花旗早排話內地下半年嘅鐵路投資將會加快，尋日就有消息話阿爺好快會推出內貿嘅「十二五」規劃，睇嚟愈係臨近十八大，就有愈多消息炒阿爺放水，亦唔排除有資金捕風捉影炒埋基建嗰份，所以三連陽嘅中鐵建亦不妨喺6蚊邊半注出擊，上望先睇6.6元。
