樓市出更：自動加租保靚舖

為迎接內地豪客來港掃高檔貨，好多連鎖金飾珠寶店近幾年喺尖沙咀喪租舖位，以往由本地連鎖時裝店插旗多年嘅栢麗購物大道頭段十幾個舖，依家差唔多清一色係連鎖金行；聽講有間金行為咗保住租緊多年嘅幾個龍頭舖，租期仲未到，但月前已決定續租，新月租大約300萬元，同依家比多出五成。

成條尖沙咀栢麗購物大道大概分為頭段同中後段，最值租嘅當然係近海防道港鐵站嗰段，以前租戶多數係本地大型時裝店，不過，近幾年情況出現大轉變。

四個靚舖月租300萬

有代理同劉Sir講，其中一間本地金飾珠寶店租用咗成條街最靚嗰4個舖，面積約5,600方呎，新租約仲未到，但租客免夜長夢多，早排已經搞續租，新月租約300萬元，呎租約530幾元。而喺嗰條街有間連鎖金飾珠寶店原先租用嘅兩個舖今年初滿約，緊接並擴充轉租同街3個舖，依家3個舖合共月租約240萬元，呎租約600元，至於之前租過兩間舖，依家業主叫租約160萬元，呎租都過600元，足見業主睇好後市。

除金飾珠寶外，內地人喜愛來港掃嘅數碼產品，同埋運動用品亦有商戶進駐栢麗購物大道較後嘅段數，豐澤電器今年初就大手租咗栢麗購物大道49至50號地舖與1樓21至25號舖，面積差唔多8,800方呎，月租約100萬元。

另外，NIKE運動用品店租咗附近嘅30及31地舖與1樓一批單位，面積約8,000多方呎，月租約100萬元。

至於鄰近柯士甸道較尾段嘅栢麗購物大道商戶，變化較細。有個賣手袋同埋旅行用品嘅負責人余生講，近幾年條街係多咗內地顧客，佢哋生意都有逾半來自內地客。

投資市場旺，買賣方面，紀惠集團行政總裁湯文亮話，啱啱以8,280萬元賣咗灣仔新銀集團中心地下2號舖，大約八年帳面賺幅近10倍。另外旺角通菜街138號地舖連閣樓就8,300萬元賣出，睇公司註冊處資料，新買家公司董事鍾佩雲，同卓悅控股（00653）副主席同名。

旺角一籃子放售值億五

好多業主把握時機放盤，第一太平戴維斯潘靜儀話，兆安李太已統業權嘅尖沙咀加連威老道54及56號全幢，依家叫價大約7.2億元。高力國際甄浚岷亦報料，有位楊姓投資者依家放售旺角太子道西150至152號地下（部分）等一籃子物業等，現市值大約1.5億元。