樓市出更：廣東道減租25%無客 北水減停搶舖

自從今年五．一長假期開始，內地豪客嚟香港血拼縮晒水，唔少針對呢班客戶嘅商戶都即刻拖慢租舖計劃。睇番過去幾個月，一線零售區月租過百萬元嘅舖位租賃，竟然只得幾宗；雖然銅鑼灣有新商場開幕，但大額消費淡風勁吹下，聽講利園山道有個單號舖，租客搬走差唔多半年，業主依家意向月租雖然仍嗌約20萬元，但可以有5%議租空間。

舖壇投資者黎永滔同劉Sir講，內地經濟增長慢咗，遊客嚟香港買貴嘢都慳住使，加埋歐洲經濟時好時壞，所以好多生意額倚重「北水」嘅連鎖店，近排傾租一線舖都少咗。

有代理話，上述利園山道單號一個面積約400方呎舖，業主嗌租約20萬元，不過近排決定將議租空間擴至5%吸客。

大道中舖丟空近一年

至於中環部分核心地舖亦罕有咁出現長時間丟空情況，其中皇后大道中雙號地舖及有關部分，連鎖時裝店搬咗近一年，業主意向月租約160萬元，呎租約640元，屬吸引水平，但係仍然租唔出。

九龍亦唔好得去邊，尖沙咀廣東道有個雙號地舖，面積大約1,000方呎，依家由食店租用，業主幾個月前叫租約200萬元，期內多次調低叫租至約150萬元，減幅達25%，但係仍未有聲氣。

馬亞木傳億八購灣仔舖

而旺角西洋菜南街一個雙號地舖，面積約800方呎，丟空咗幾個月，業主意向月租企硬50萬元，較前租增逾一倍，至今仍未能租出，市場人士相信，以現市況計，若租客有誠意，月租近40萬元都有機會傾成。

不過，有投資者就睇好後市，斥約1.88億元向資本策略地產（00497）連約購入灣仔安盛中心地庫，呎價近1萬元，收租回報大約3.3厘，有代理傳新買家係「小巴大王」馬亞木。

另外，傳屢錄收購嘅深水埗巴域街，有個單號地舖以約3,380萬元售出，面積大約1,200方呎，呎價超過2.8萬元。

美聯旺舖李錦強報料，俊文珠寶或有關公司嘅駱克道521號舖租期今年十月滿約，啱啱先畀本地連鎖店以每月大約80萬元預租，呎租約800元，高出只係約六成。