Fundman睇市：聯通難落手

美國經濟數據理想，道指差唔夠1%經已上番五月初高位，可惜遭A股拖後腿的港股，挾在美、中股市之間，兩面不是人。昨日儘管先跌後企穩，恒指收市跌11點，報20,104點，但主板成交得378億，水盡鵝飛，從好的角度睇，要沽貨基金唔多，市底也漸漸在兩萬點水平，找到平衡。

港股已經十一個交易日，困在19,911至20,300點間，即使買賣兩閒，淡友卻未有放軟手腳，連續七日沽空成交比例企穩一成樓上。累積沽空愈多，意味市況一旦突破，淡友被挾的可能性正在上升。

中移（00941）七月3G上客量按月減少32.5%，至190.1萬戶，十五個月以來首次低於200萬戶，數據令捧場客失望，股價再跌1.3元，報82.35元。睇番業績後短短四日，股價累積跌10.2元或者11%。反之收市後聯通（00762）公布3G上客數字淨增長308.7萬，幾乎比中移多出六成二，年初聯通出到15至20元割喉式月費搶3G客，每個月飄忽不定的上客數字，筆者已不會太過在意，倒不如等埋周四份中期成績表。瑞銀預測聯通收入升13.6%，至1,026億元人民幣，EBITDA及盈利分別為355億及33億元人民幣，增長10.8%及25.4%。老土講句，中移、聯通估值是天與地，一二年分別係10.5倍及31倍，即使有不利因素困擾中移，也很難勉強投入聯通懷抱。

富士康炒業績翻身

蘋果公司上星期股價高見648美元創新高，年初至今股價已累積六成升幅，次按海嘯、歐豬爆煲好似同佢毫無關係。分析機構Jefferies上星期出報告話同零部件供應及供應鏈管理商收風，7吋迷你iPad已交付代工商開工生產。另外，早前大行預測，迷你iPad會和潮人朝思暮想的iPhone 5，在九月十二日新產品發布會上公布，九月廿一日全球發售。香港上市幫蘋果組裝產品的富士康（02038），昨日收市價2.93元，比七月低位2.22元，足足反彈32%。

○六年富士康股價高見27.7元歷史高位時，幾乎通街分析員建議客仔買貨，其後股價點走，有五年以上股齡者都心照。曾躋身藍籌的富士康，一○年七月打後足足十三個月，彭博顯示竟連一間喊「BUY」的大行都無，可算是富士康的黑暗期，期間股價由5.5元升至6.35元，再掉頭碌落3.2元。不過，逆轉故事始終最吸引分析員，最近一季再見有大行開始因為業績由紅轉黑，睇番好富士康。下周一出成績表前，炒逆轉故事仲有幾日安全期，讀者可以一試，但最緊要懂得見好就收。