魚缸Blogger：山東墨龍仲有得升
尋日港股完全跟內地股市走，內地跌恒指就回，內地升恒指就抽。上個禮拜內地公布咗多項經濟數據，由於表現麻麻，所以市場都好期待中央幾時會出手，減息當然係市場預期措施之一，睇怕今個禮拜歐美無乜特別嘅情況之下，內地股市會繼續左右港股。
山東墨龍（00568）上周初由1.8元水平起步，日前升到100日線2.5元遇阻力，諗住佢要調整吓，點知佢尋日再嚟過，升穿咗100線之餘，仲突破埋六月至七月期間的橫行區。集團會喺下個禮拜五公布業績，去年度公司業績就麻麻，盈利倒退近四成，但係公司第一季盈利已回復增長，可能市場憧憬公司中期業績會有好表現，所以近日炒得咁勁，由於股價成功破位，睇怕短期仲有得升，阻力3元。
