魚缸Blogger：一太醞釀旗形突破
內地尋日公布嘅經濟數據，市場反應大致正面，同時預期阿爺短期內減息、減三條R嘅空間增加，相信恒指今浪目標可先睇五月裂口20,670點水平。
近排大細價股滿布地雷，中字股仍受盈警潮拖累，故今日不妨留意吓隻第一太平（00142）。盈利來源主要喺菲律賓同印尼嘅一太，業務範疇遍及基建、食品、電訊同礦產，而四大業務嘅現金流一向穩定，被視為防守力不俗嘅股份。集團尋日宣布持股近六成嘅MPIC，上半年多賺76%後，刺激一太股價抽升逾4%，並且醞釀突破小旗形走勢，如果今轉能夠衝破9蚊大關，阻力可上推至9.3元。
