市場徐想：本港樓價繼續企硬
近期大家議論紛紛，無非都係講緊二手居屋開放畀白表人士免補地價嘅影響。單睇上車盤同細價樓嘅市場，大家有留意近期新聞，都會睇到成交量持續上升，小型屋苑項目更加係搶手貨。
要解決房屋問題，除咗增加供應之外，的確應該由舊居屋市場入手。九七年八萬五事件，係因緣際會而成。以前一個人頂幾層樓，依家呢種事情根本過唔到銀行按揭。社會上私人住宅短缺嘅需求量，絕對多過政府提供嘅5,000名額，如果唔係社會上面嘅回響點會咁大？短期供應量冇可能驟然增多，樓價自必然繼續上升。加上全球銀紙供應量大增，樓價上升某程度上只係反映通脹，香港有聯繫匯率，樓價向上嘅機會，依然大過向下。
依家樓價係好貴，但種種原因會令樓價依然居高不下！好似紐約、倫敦等大城市，其實都出現呢個現象！只不過香港唔似人地咁大個城，買唔起市區樓嘅人可以住郊區。繼續追蹤，出發！
