牛熊對壘：渣打續博反彈吼15209

文學名著《雙城記》的名句，「這是最壞的時代，這是最好的時代」，套用於股票市場亦可。六月初市場氣氛極差，恒指跌到18,056點的年內低位，原來正是谷底反彈的轉捩點，兩個月來恒指反彈超過2,200點，個別股份更升足三、四成，期間不少散戶股友堅持睇淡，本周所見，資金持續流入熊證及Put輪淡倉，繼續唔認輸。

港股昨日高低波幅151點，收報20,269點，今年五月開始的調整市，已收復了大半失地。牛熊證成交按日升24%至63.93億元，全日有29隻熊證被強制收回，24隻是恒指熊證。前日熊證重貨區20,500至20,599點的相對期指張數為933張，較牛證重貨19,500至19,599點的556張為多，多逾六成比例，淡友未鳴金收兵。

好友會否繼續殺上？恒指雖仍具再升動力，但部分重磅股開始有橫行之勢，八月期指低水75點，就算未觸及早前所講的20,500點，都要減少注碼，因當別人恐懼時，你要貪婪；當別人開始變得貪婪時，就要留番一手，唔好去得太盡，落袋的錢才是真錢。

重磅股上升動力放緩

內地公布七月份CPI按年升1.8%，跟市場預期唔差得遠，短期應再有放水措施，但有預測指七月份數據有可能是全年的最低點，即未來通脹有機會高番啲，有幾高就真係得個估字。

輪場一班股民大呻話，早前不停炒作中移（00941）、建行（00939）及工行（01398）內銀Call，雖話正股股價持續低位反彈，中移仲要見過三年半高位，惟升幅唔夠爆，執極有限。近期所見，內銀窩輪成交算是活躍，建行輪昨日成交3.5億元，排活躍榜第五位，卻未見資金配合流入，熱烈程度實際一般。

渣打集團（02888）的洗黑錢指控，故事愈聽愈多，有話因銀行高層的態度欠佳，件事先至搞到咁大，但英國政治界對銀行力撐，美國又一向視英國為「朋友」，件事最終由大化小的機會唔細，進取的不妨考慮相關價外證，渣打麥銀購（15209）明年一月三日到期，行使價200元，實際槓桿8.8倍。