Fundman睇市：煤電股體現搖搖板理論

投資者選擇等埋聯儲局主席伯南克演說，猜度QE3登場時間表，以及今日中國七月份通脹數字先算，形成尋日港股有波幅無升幅的悶局，恒指跌7點，主板成交458億元，暫時是本周最低。技術走勢上，恒指由五月初21,385點碌落谷底18,056點，重返兩萬關口樓上，一連三日都無法突破0.618反彈阻力20,113點，股市會唔會好似七月初的反彈一樣短癮，個人睇法是：機會唔細！

市場預期中國七月通脹由上月增長2.2%進一步回落至1.7%，為人行提供更大貨幣寬鬆空間。事實是二月、五月兩減存備率，六、七月兩減存貸息率，滬綜指反而由年初高位2,460點，陰陰落去到2,100點水平，減息等同幫到股市的說法站唔住腳。五、六、七月內地樓價又再拗腰回升，中央多次要求地方政府維護壓制樓價措施成果，投鼠忌器下，只怕對人行期望愈大、失望愈大。

渣打暫時未宜沾手

經過周二洗倉潮，被美國紐約州金融局指控協助洗黑錢的渣打（02888），有穩定落嚟迹象，股價反彈1.324元報159.3元。尋日飯局一個非正式統計，筆者幾個基金老友都無普羅股民咁樂觀，大都認為涉及指控洗黑錢金額高達2,500億美元，即使最後小懲大戒，涉及罰款可能相當驚人。朋友話即使「特殊情況基金」今次都未必敢冒險博反彈。收市再問借貨行，渣打確係惹火尤物，以往一日沽空不過五萬、十萬股，尋日老友話朝早已一股難求。睇番兩日累積沽空962萬股，較事發前兩個月加埋仲要多，對沖基金在160元樓下仲依然隊到行，筆者都係維持原判，唔掂正股，等佢債息彈番上8厘樓上至諗。

煤炭股同電力股，好似坐着搖搖板兄弟一樣，你升高時我走低。內地煤炭供過於求，股價級級落，神華（01088）及兗煤（01171）股價也由年初高位，到七月秦皇島堆煤區爆滿，跌到人人眼見大鑊時候見底，累積跌33.7%及45.3%，反之，捱了多年貴煤的電力股，上半年威番一陣，電企一哥華能國際（00902）由年初低位4.18元，升到最高見5.85元，升幅近四成。

最近，難兄難弟強弱形勢又再逆轉，七月下旬煤價反彈掀起市場對下半年煤炭價格一陣憧憬，幾隻煤股反彈，神華、兗煤累積由低位升25.8%及22.1%，反之電力股又再回吐。但瑞銀估計，今年內地電力需求增長只有6%，加上水力發電投入高峰，七、八月電力需求旺季之後，煤價升勢可能無以為繼。

筆者喜歡神華，中小型煤礦被勒令停產者眾，神華可擴大市佔率。但短期而言，電力股業績由紅字轉黑字，故事更動聽，以華能為例，一二至一三年是業績轉捩點，以目前1.15倍市帳率，比歷史平均1.63倍折讓近三成，中線估值修正看來還未完成。