Fundman睇市：霉股發威竟變主題

德拉吉一句說話：「歐洲央行將採取一切必要措施去捍衞歐元」，確係字字可比萬金。上周五歐美股市慶祝過後，尋日又輪到亞洲股市為此瘋狂，日、韓股市升超過2%，預早在上周五已經偷步的港股也再下一城，升1.7%。

德拉吉可以在德國唔讓步之下，擺平西、意兩隻歐豬經濟危機？信住佢五成似乎都嫌多，但當前股市淡友當道，即使經濟未見底，只要偶爾反彈也可隨時殺淡友一個措手不及。

恒指尋日升332點，報19,998點，全日波幅113點，開市後被點穴一樣，期指要到臨收市前一小時，先開始有啲波動，始終大市過去七個交易日升1,381點，昨日收市轉炒低水，反映部分好友選擇鳴金收兵，平倉食胡睇定啲。招股反應淡過白開水的DYNAM（06889），收報12.54元，以招股價下限14元認購，即輸10.4%，奇就奇在這彈珠機經營商，第一日無太多大孖沙護盤，全日成交574萬股，僅發行新股5.6%（或者散戶認購部分58.8%），可見街貨頗「乾」，不妨留意未來幾日發展。

雨潤（01068）上星期死貓彈，「愈發霉愈炒」成為股市無主題下的當炒主題。體育用品股發威，源於安踏（02020）公布半年業績跌17%賺7.7億元人民幣，無分析員估計咁衰，股價彈17%，帶動同業股價都鹹魚翻生。諗落安踏確有一炒價值，外國品牌評審公司Interbrand，舊年選出中國五十大品牌，安踏排十七，品牌價值緊隨青島啤酒（00168），卻高於中信証券（06030）、民生銀行（01988）等鼎鼎「大名」，扣除所持現金，以121億元市值減一減，個招牌約值12億美元，等於美國Nike市值三十六分之一，中國體育品牌一哥平成咁，一個唔該，隨時畀外國公司睇中都唔定。

博水泥股揀海螺

今年上半年，中國新增水泥產能1.08億噸，按年升10.9%，增幅低過過去三年，但需求疲弱，供過於求情況有惡化迹象。上星期內地水泥平均價格按周再跌0.7%，至每噸326元人民幣。由年初至今，水泥價格平均累積下跌14%，東部沿海城市供過於求情況較嚴重，跌幅達29%。

市場期望大規模基建投資，無奈中央講明可一不可再，新增產能持續釋出，水泥價格造成漫長壓力。

博水泥股反彈，要揀營運效率較佳，毛利率較優勝，至少在逆境中有較佳抵禦能力，去年兩間毛利率表現最好公司，安徽海螺（00914）及華潤水泥（01313），事實其往績市盈率7.7及6.5倍，比同業3至5.5倍高出一籌，可見投資者預期水泥價格回落，他們有較高承受能力，海螺市帳率兩倍，與五年歷史低位相若，估計需求在第三季末、第四季或有回升機會，個人觀感，是短期股價經已見底。