Fundman睇市：沽神明燈照耀萬民

巴塞球迷，對加泰隆尼亞應該唔會陌生，這個屬於西班牙較富裕的自治區，居然話無力償還借貸利息，需要向西班牙央行尋求援助，前晚西債抽上7.59厘的歐元誕生後新高，消息話一旦歐洲央行唔盡快恢復買西班牙國債，該國政府不排除要求全面救助，避免財務崩潰。

西班牙今日十足十碌爆卡，勉強還住「min pay」嘅大種債仔，今年經濟增長近零，未來兩年樂觀估計都係得1至1.5%，舊債到期，債養債成本一旦企穩7厘樓上，條街數將如同雪球一樣愈滾愈大。而今次同四、五月希債危機嘅最大分別，係萬一西班牙開口要求歐央行援助，5,000億歐元規模的歐洲穩定機制（ESM），隨時被西班牙一國掏光，一旦火燒連環船波及意大利，真係唔知點收科。

日前，沽神普爾遜主持季度投資檢討會，預測歐元區最終有50%瓦解風險，名嘴中，都算係睇得最淡嘅一人。不過，沽神○七年賭次按爆煲威到盡之後，之後幾乎賭乜輸乜，重倉美國銀行股賭復甦，結果歐債危機金融股大插；第一季睇好黃金，又遇資金避險潮買美元沽黃金；今次檢討主要是向客仔致歉，皆因旗艦基金Advantage Plus上半年又輸16%止唔到血。

今年四月沽神估德國會被其他「歐豬」兄弟拖累，大手沽空德債，殊不知希、西、意債輪住散，熱錢反而湧去德債，十年德債息由四月初1.8厘，碌落1.16厘創歷史新低，息跌意味價升，沽神又揩，好自然出口術為睇錯市辯護，冀望班愈輸愈甘的大客，畀多些少耐性咪「抽資」。常言道，賭錢要搵運氣較自己差的對手，俗稱搵「燈」，呢招股市一樣啱使，沽神開口，正好為投資者在黑暗中帶來一線曙光。

港股半日市，恒指跌150點，報18,903點，滙豐的七月中國製造業指數彈番到接近50盛衰分界水平，見49.5的五個月高位，可惜股市焦點去咗歐洲，幫助唔大。

銀基未能令人放心

銀基（00886）向廣州藥業（00874）收購潘高壽食品飲料五成權益，收購項目主要包括「潘高壽」品牌涼茶、龜苓膏、枇杷飲料及潤喉糖產品，年初至今股價跌近五成一的銀基，受消息刺激微升1%，見3.11元，但五糧液代理賣枇杷膏，令人有風馬牛不相及之感。

消息唔多的銀基，年初被彤叔睇中，由6.6元買到落3.2元，鍾意追大戶手影的真係喊得一句句。過去一年，民企浪接浪爆出管治危機，芬佬聞風喪膽，加埋內地白酒消費開始受經濟淡風影響，但咁奀的保健品項目，對比銀基近37億市值，幫助有幾大，見仁見智，看來見到股價確認轉勢前，細細注玩吓無妨，但上月公布份成績表，營業額升34%，應收帳卻大升兩倍達14.4億，話可以放心去買都係呃你。