股海實戰：中國建築具承接力

西班牙同希臘呢兩個病君又再發作，搞到人心惶惶。港股低開381點後反覆向下，午後跌幅擴大，收報19,053點，跌587點，成交510億元。

凱雷減持太保（02601），內險股全線大飲茶，連升得好哋哋嘅國壽（02628）都無可幸免，收市險守21元，跌幅4.7%，短線未能企穩21元又或失守250日線20.66元，都會考慮先行沽出止蝕避避風頭。另一內險股新華保險（01336）股價曾低見25.05元，基金沽得咁狠，睇嚟即使公司嚟緊通過派特別息，涉額都唔會多。

平貨出籠增沽壓

受歐洲病豬拖累，大笨象（00005）股價挫半成。翻查資料，○九年四月，滙控曾向僱員授出認股權，分一、三、五年共三個年期，可認購合共1.52億股股份，其中三年計劃將於今年八月一日開始行使，合共可認購7,609萬股，經折算每股行使價講緊係37.8到40元不等。咁多平貨可以隨時掟出街，難怪引來空軍目光，尋日沽空比率達24%，真係想飛都難！

上周內地官方頻頻高調聲言不放鬆樓市調控，內房股變得冇神冇氣。不過，專門做建築工程嘅中國建築（03311），今年以來股價翻半番有多，最近更喺大淡市成功配股集資逾22億元，當真唔簡單。究其原因，公司積極參與內地保障房及香港公屋建設工程，今年上半年新簽合約同比增42%至275億元，其截至六月底止手頭總合約額988億元，其中未完合約額約656億元，同比增36%，足夠未來三年建造。正正由於公司所涉獵嘅都係兩地政府支持嘅發展項目，即使外圍風大雨大，公司今、明兩年盈利仍有保障，故吸引基金接貨。

受累跌市，中建築股價已失守配股價7.57元，短線主要承接區喺7至7.2元，一旦大市再度急挫，此股下一重要支持喺250日線6.45元。考慮到月底期指結算前大市波幅可能進一步擴大，暫宜先觀望其低位承接，但其中長線展望並不悲觀，尤其係今次集資過後，日後可更積極競投新項目。嚟緊可刺激股價表現嘅因素，包括母公司可能出手增持，以及公司可能會因應中績表現而上調全年合約目標。