SUN勢力：中國電力趁勢買入
恒指尋日喺成交增加下升333點，而積奇上周一推介嘅中化肥（00297）更升逾7%，正好升抵當日的目標價。另一方面，留意到中國電力（02380）喺2元水平橫行咗逾一個月後，尋日成功以大陽燭上破阻力，不妨趁勢買入。
內地去年兩度上調電價，加上通脹及煤價大幅回落，電力股今年普遍跑贏大市。而人行兩度減息，亦有利負債較重的電企降低財務費用。同時從事水力及火力發電的中國電力，去年除面對一般火企面對的高昂成本壓力外，亦因水源偏枯而令水電銷量減少，全年盈利倒退，但集團今年上半年水電發電量按年升逾兩成，達594.4萬瓦時，相信有助帶動盈利反彈。
集團早前收購了河南中平煤電五成權益，以進軍上游煤炭業務，確保煤炭供應穩定的同時，亦有助進一步控制成本。而隨着夏季的到來，用電需求上升，利好電力股氣氛。走勢上，下一阻力位在2.32元。
