市場徐想：雅士利宜考慮回購
係上星期所謂嘅「黑色星期五」，阿爺出咗增長數據，「保八」一早叫你唔好諗，高過7.5%叫做有交代！市況不穩，都係嗰句，「炒股唔炒市，除非玩期指」。
記得上年呢個時候，盈喜股逐隻炒，今年盈喜冇份，盈警就隻隻中，市場氣氛更加係一潭死水，呢個時候，有公司寧願轉攻為守，講緊嘅係雅士利（01230）。雅士利係內地第七大BB奶粉生產商，市場佔有率百分之十左右，唯一賣點就係用外國奶源，唔怕有三聚氰胺。
雅士利唔用上市得來嘅錢擴展版圖，反而拎咗去買總數達5億人仔嘅保本型理財產品，畀人哋話佢「不務正業」。睇吓佢嘅現金，多到離晒譜，有錢唔擴展，確係令小股東「心底碎了又碎」。雅士利大可做好盤數搵個有頭有面嘅長途伴侶，蒙牛（02319）就係一個可以參考嘅對象，去年盈利少咗四成，管理層無得避，要令小股東合皮，回購或者加派股息都可以諗。
