股海實戰：康師傅候調整再考慮

人行一個月內兩次減息，中央要「穩增長」嘅訊息已十分明確，偏偏A股仍無動於衷，上大人惟有再出口術。溫爺爺高調接見專家廣納意見，仲話嚟緊要喺鐵路、能源等領域做幾件鼓勵人心嘅實事，提振投資者信心。但尋日滬綜指都只係升10點敷衍回應，反映股民不為所動。

睇番香港魚缸，浙江民企出事，或令建行（00939）30億元人仔貸款泡湯嘅消息，股價尋日裂口低開，埋單唔見2.9%，收報4.93元。游資缺乏炒作出路，尋日又再翻叮有國策支持嘅醫藥板塊，印象中每逢跌市皆有好表現嘅廣藥（00874），迭創新高，尋日高見17.4元，收報16.86元，升7.6%，而國藥（01099）、神威藥業（02877）、中國製藥（01093）升幅介乎6至9%。呢轉利君（02005）尚未發力，可以多望兩眼。

要繼續搵跌市奇葩，本地地主股走勢亦唔錯，建議留意新世界（00017）、希慎（00014）同美聯（01200）。至於內地方面，雖然官媒提醒央企不要幫手抬高樓價，但近日北京依然拍出地王。橫睇豎睇，中資股兩大引擎內房及內銀股都受制於政策面，有波幅冇升幅，變相限制咗A股同國指表現，仍停留喺魚缸嘅游資，嚟緊只有繼續游走於其他板塊。

食品股首選旺旺

年初內地通脹壓力備受關注，但到咗年中，CPI數據顯示通脹已受控，嚟緊幾個月大宗商品價格將持續下行，相信對於食品製造商而言，來自原材料價格嘅成本壓力可以得到紓緩，毛利率有改善嘅空間，季內食品股有望繼續吸引游資嘅目光，首選仍然係旺旺（00151），等股價落番9至9.5元水平可以諗諗。

至於康師傅（00322），阿莊相信股價表現會繼續跑輸同類股，皆因繼首季業績遜色後，次季方便麵市場競爭加劇，料中績顯示整體毛利率仍然受壓；至於與百事嘅合作，雖然長遠利好，但業務磨合需時，且令飲料業務今個旺季嘅表現添變數。

股價方面，次季低見17.9元始現反彈，尋日曾高見20.5元，估計升至21元水平阻力甚大，現價追入未必值博，宜待短期反彈完成，中績公布前後，股價再考驗一○年以來喺17至18元構建嘅平台承接，再予以認真考慮。