Fundman睇市：濠賭股頂上光環失色

港股確係基金提款機，外圍跌1%，佢就往往跌夠2%，美股上星期五插水，預託證券顯示港股開低兩三百點在所難免，勢估唔到早市一瀉501點，當時睇吓部機，成交只係二百億未到，可見，芬佬要錢唔要貨之外，根本跌得誇張的更大原因，是市場承接力嚴重不足，唔少基金見歐洲消息完全無法掌握，索性靠邊站，形成小小沽壓已經隊到開巷，恒指最後跌372點，報18,185點，主板成交517億元，沽空佔成交比例高企10.8%，是連續第四個交易日企在雙位數水平。

俗語話生意淡薄不如賭博，但主攻內地客的澳門博彩業，尋日公布五月份博彩數據，在在證明實情係生意淡薄，無銀賭博。即使有五月黃金周之助，澳門博彩收入仍只得7.3%增長，至260.8億澳門幣，增幅創三年新低，同四月份的22%相比，唔見咗三分之二。消息一出，濠賭股跌到一仆一碌。

事實上，四月之前走勢一直優於大市的濠賭股，有迹象失卻頂上光環，強如剛獲選入藍籌的金沙（01928），四月中高位33.05元至尋日低位24.6元，累積跌近兩成五，跌幅比恒指有過之而無不及。常言道，強勢股開始洗倉，乃大市即將見底先兆，且看今次又靈唔靈？

要數最失望，藍籌中一定是港交所（00388），話就話黑池等場外交易商有唔少挑戰，但幾年來基本上無影響獨市生意特質，股市逆境時，盈利跟隨大市成交額倒退，食得鹹魚抵得渴的捧場客，大抵有心理準備。近日競購倫敦金屬交易所（LME），老實講街外叫好嘅人唔多，五月初公布向LME提親以來，港交所股價跌近兩成，市值蒸發260億，一宗12億鎊，或144億港元的交易，代價真係唔細。

港交所兩面不討好

昨日港交所股價跌5.1元，報101.5元，同去年歐債危機時造出的三年低位99.15元，近在咫尺，全因市場傳出，進入最後兩強的港交所及美國洲際交易所（ICE），可能仲要提價博LME對合併首肯，包括一大堆阻礙未來提升LME盈利能力的「不平等條約」，好似倫敦總部地址，董事會及現行金屬價格交易系統，均維持現狀。

或許有陰謀論者認為，收購着眼於長遠中港市場融合，為內地金融市場進軍環球金屬交易作跳板角色，更不能排除一旦收購落實，有策略股東入股，收購所需隨時不假外求。不過事實擺在眼前，LME這百年老號，一○年度成績表只係賺950萬鎊，即大約1.14億元左右，港交所以百倍估值收購，在有效將LME進一步商業化之前，業績難免被攤薄，而近期港股日均成交跌到唔夠550億，無論收購交易或者基本因素，港交所可謂兩面不討好，較安全做法，當然係等收購消息落實，即使已持有的，也無需急於入市溝貨。